Sbecian ac uwchsbecian

Sbecian

Sbecian yw pan fydd rhywun yn cael pleser rhywiol o wylio, tynnu lluniau neu recordio pobl eraill yn gwneud rhywbeth sydd fel arfer yn breifat, er enghraifft pan fyddan nhw’n noeth neu'n cael rhyw.

Mae sbecian yn drosedd os caiff ei wneud heb ganiatâd y person. Mae'r drosedd yn cynnwys tynnu lluniau neu ffilmio pobl eraill er pleser rhywiol rhywun arall.

Uwchsbecian

Mae 'uwchsbecian’ yn derm anffurfiol am fath o sbecian pan fydd rhywun yn defnyddio offer fel camera neu ffôn symudol i dynnu lluniau neu fideos o dan ddillad person, heb eu caniatâd nhw.

Nid yw'n gyfyngedig i fenywod sy'n gwisgo sgertiau neu ffrogiau ac mae'n gymwys i unrhyw un sy'n gwisgo cilt, siorts, trowsus neu unrhyw ddillad eraill.

Mae'n digwydd yn aml mewn mannau gorlawn fel cludiant cyhoeddus neu wyliau cerddoriaeth, sy'n gallu ei gwneud yn anodd sylwi arno.

Mae uwchsbecian yn drosedd p'un a yw'n cael ei wneud er pleser rhywiol neu i fychanu rhywun neu beri gofid iddyn nhw.

Beth i'w wneud os bydd hyn yn digwydd i chi

Efallai y byddwch yn teimlo pryder, ofn, diffyg ymddiriedaeth neu fel pe bai rhywun wedi ymyrryd â chi. Neu efallai na fyddwch chi’n teimlo braw neu ofid o gwbl. Does dim ffordd gywir neu anghywir o deimlo.

• Dewch allan o'r sefyllfa'n gyflym os gallwch chi.
• Os ydych chi mewn lle cyhoeddus, symudwch i ffwrdd.
• Peidiwch â chael dim byd i wneud â’r troseddwr yn uniongyrchol.
• Os ydy hi'n bendant yn ddiogel gwneud hynny, ystyriwch dynnu llun ohonyn nhw o bellter diogel.
• Riportiwch y drosedd i ni, os ydych chi'n teimlo y gallwch chi.

Riportiwch y peth

Mae'n cymryd dewrder i riportio rhywbeth anghyffyrddus, ond os ydych chi’n teimlo y gallwch chi siarad â ni, fe fyddwn ni bob amser yn eich cymryd chi o ddifrif.

Gall eich adroddiad ein helpu i atal hyn rhag digwydd i rywun arall. Weithiau mae pobl sy'n cyflawni'r math hwn o drosedd yn mynd ymlaen i gyflawni troseddau mwy difrifol.