Diweddariad ar y tân ar drên yn Llangennech - Cymru

Diweddariad am 5.30pm ar 27 Awst - Dywedodd yr Uwch-arolygydd Andy Morgan:“Rydym wedi parhau i ymateb i’r digwyddiad mawr ar y rheilffordd ger Lllangennech trwy gydol y prynhawn yma, ochr yn ochr â llawer o’n partneriaid.

Mae swyddogion yn cynnal ymholiadau cychwynnol ac maent bellach wedi gallu edrych ar y trên o bellter diogel. Rydym yn aros am arweiniad pellach ar pryd y bydd yn ddiogel i ni gael mynediad llawn i'r olygfa.

Unwaith y bydd yn ddiogel gwneud hynny, bydd ein cydweithwyr yng Nghyfoeth Naturiol Cymru hefyd yn gweithio i asesu'r effaith amgylcheddol yn llawn a chynghori Network Rail ynghylch pryd y gall y gwaith o lanhau'r safle ddechrau

Dywedodd yr Uwch-arolygydd Andy Morgan:“Dros nos, fe wnaeth swyddogion o Heddlu Trafnidiaeth Prydeinig, Heddlu Dyfed-Powys, Gwasanaeth Tân ac Achub Canolbarth a Gorllewin Cymru, y gwasanaeth ambiwlans a Chyngor Sir Caerfyrddin ddelio â digwyddiad mawr ar y rheilffordd ger Llangennech.

Rydym wedi lansio ymchwiliad a byddwn yn cynorthwyo'r Swyddfa Rheilffyrdd a Ffyrdd a'r Gangen Ymchwilio i Ddamweiniau ar y Rheilffyrdd i sefydlu'r union amgylchiadau y tu ôl i'r digwyddiad.

Yr hyn rydym yn ei wybod yw bod trên nwyddau, a oedd yn cario llawer iawn o olew disel, wedi mynd ar dân ac mae nifer o'i wagenni hefyd wedi mynd oddi ar y cledrau. Diolch byth, er gwaethaf y perygl amlwg, ni adroddwyd am unrhyw anafiadau. Llwyddodd y ddau aelod o staff y rheilffordd a oedd yn gweithredu'r trên i godi'r larwm a dadfachu'r locomotif a'i symud i le diogel.

Roedd y tân yn arwyddocaol oherwydd maint y tanwydd yr oedd yn ei gario ac roedd yn roedd yn cyflwyno perygl posibl i'r gymuned ehangach.

Fel rhagofal, caewyd ffyrdd, a gwagiodd Heddlu Dyfed-Powys nifer fawr o gartrefi o fewn radiws i'r tân.

Rwy'n credu bod oddeutu 300 o bobl wedi cael eu heffeithio a hoffwn ddiolch i bawb am eu dealltwriaeth a'u camau gweithredu cyflym yn yr hyn yr oedd yn rhaid ei fod yn amser brawychus.

Ar yr adeg hon, nid yw achos y tân yn hysbys ac, wrth i'r tân barhau, mae risg sylweddol o hyd o fewn ei gyffiniau, felly rydym yn dal i gynghori pobl i osgoi'r ardal

Mae ein swyddogion yn cynnal ymholiadau cychwynnol ac wrthi'n casglu datganiadau tystion allweddol a theledu cylch cyfyng. Unwaith y bydd y tân wedi'i ddiffodd, a bod y lleoliad yn ddiogel i'w hasesu a'i hymchwilio, byddant yn cynorthwyo'r ORR a'r RAIB ymhellach yn y fan a'r lle.

Roedd hwn, ac mae'n parhau i fod, yn ddigwyddiad heriol iawn. Hoffwn ddiolch i'n holl bartneriaid am eu cefnogaeth a'u gwaith parhaus i sicrhau diogelwch y gymuned gyfagos."