Paentiwr chwistrell cyfresol wedi'i ddedfrydu ar ôl achosi £4,000 o ddifrod i drenau - Cymru

Mae dyn a achosodd dros £4,000 o ddifrod ar ôl sbri graffiti yng ngorsaf reilffordd Rhymni wedi cael ei ddedfrydu, yn dilyn ymchwiliad gan Heddlu Trafnidiaeth Prydeinig.

Bu Don Midasoni, 32, ac o Hartcliffe Way ym Mryste, yn gysylltiedig â dau ddigwyddiad ar 22 Chwefror ac 11 Mawrth 2018, lle targedodd gerbydau trên yn nepo gorsaf reilffordd Rhymni.

Arestiwyd Midasoni ar 24 Ebrill 2018 ar amheuaeth o ddifrod troseddol. Fe wnaeth technoleg Adnabod Rhifau Cerbydau yn Awtomatig a data safle ffonau symudol gysylltu ei ffôn symudol a'i gerbyd â'r ardal ar ddyddiad y digwyddiadau.

Ar ôl atafaelu eitemau o'i eiddo, canfuwyd nifer o ffotograffau a fideos o droseddau graffiti yn digwydd yn nepo Rhymni.

Plediodd Midasoni yn euog i ddau achos o ddifrod troseddol a chafodd ei ddedfrydu yn Llys y Goron Caerdydd ar ddydd Gwener 22 Mai

Cafodd ddedfryd o naw mis, wedi'i ohirio am flwyddyn, ei orchymyn i wneud 100 awr o waith di-dâl, a chwblhau hyd at chwe diwrnod o weithgarwch adsefydlu. Rhaid i Midasoni hefyd dalu £4,216.17 mewn iawndal i Drenau Arriva Cymru a £140 mewn gordal dioddefwr.

Dywedodd y swyddog ymchwilio PC Ashley Wilkins:“Nid yw graffiti yn drosedd heb ddioddefwyr - fandaliaeth ydyw mewn gwirionedd, sydd â goblygiadau ariannol enfawr i’r diwydiant rheilffyrdd a’r trenau y mae pobl yn teithio arnynt.

“Mae Midasoni yn droseddwr toreithiog a achosodd ddifrod helaeth. Rwyf yn gobeithio bod y ddedfryd hon yn anfon rhybudd clir na fydd y math hwn o ymddygiad yn cael ei oddef ar y rheilffordd, ac y bydd y troseddwyr hyn yn cael eu dwyn gerbron y llysoedd. ”