Diffibrilwyr achub bywyd wedi'u difrodi mewn gorsafoedd ledled Cymru
Cynnwys y prif erthygl
Rhybudd am ganlyniadau difrodi diffibrilwyr ar ôl cyfres o fandaliaeth mewn gorsafoedd ledled Cymru.
Yn ddiweddar gosodwyd diffibrilwyr, sy’n cael eu defnyddio i roi sioc drydanol ynni uchel i galon rhywun sydd ag ataliad y galon, mewn sawl gorsaf gan Trafnidiaeth Cymru.
Ers eu gosod, mae saith achos o ddiffibrilwyr yn cael eu difrodi neu eu dwyn wedi cael eu hadrodd yn ystod y naw mis diwethaf mewn lleoliadau gan gynnwys Pencoed, Parc Ninian, Llansawel, Sarn, Llandeilio a Llandudno.
Mae swyddogion yn patrolio gorsafoedd ac mae camerâu wedi'u gosod i ddal digwyddiadau ac erlyniad yn erbyn unrhyw droseddwyr. Mae diffibrilwyr hefyd wedi cael eu cloi mewn cypyrddau i atal lladrad neu ddifrod.
Yn ôl Sefydliad Prydeinig y Galon Cymru, mae tua 2,800 o ataliadau ar y galon y tu allan i'r ysbyty yng Nghymru bob blwyddyn, ond dim ond 1 o bob 20 o bobl sy'n goroesi.
Mae pob munud heb adfywio cardio-pwlmonaidd (CPR) a diffibriliwr yn lleihau'r siawns o oroesi hyd at 10 y cant, ond gall CPR a diffibrilio ar unwaith fwy na dyblu'r siawns o oroesi.
Dywedodd Arolygydd Heddlu Trafnidiaeth Prydeinig, Richard Powell: “Mae bywydau’n cael eu peryglu gan bobl sy’n dwyn ac yn fandaleiddio diffibrilwyr.
“Dylai troseddwyr feddwl sut y bydden nhw’n teimlo pe na bai nhw eu hunain, neu eu perthnasau, yn gallu cael eu hachub oherwydd bod offer allan o drefn oherwydd fandaliaeth neu ladrad.
“Os bydd unrhyw un yn gweld unrhyw beth amheus ar y rheilffordd, anfonwch neges destun atom ar 61016. Mewn argyfwng, ffoniwch 999 bob amser.”
Dywedodd Karl Gilmore, Cyfarwyddwr Seilwaith Rheilffyrdd Trafnidiaeth Cymru: “Mae’n hynod siomedig, o fewn wythnosau i’r cam cyntaf o osod diffibrilwyr achub bywyd yng ngorsafoedd trenau TrC, fod nifer wedi’u fandaleiddio a bydd angen eu trwsio nawr.
“Mae’r diffibrilwyr yn arf hanfodol ar gyfer y gymuned gyfan ac mae’r fandaliaeth hon yn peryglu bywydau pobl.
“Gall ataliad y galon ddigwydd i bobl o bob oed a gall defnyddio diffibriliwr gynyddu siawns rhywun o oroesi yn fawr. Mae’n bwysig bod y diffibrilwyr ar gael mewn lleoliadau allweddol, fel gorsafoedd rheilffordd, ac mewn cyflwr gweithio da.
“Gofynnwn i unrhyw un sy’n gweld diffibriliwr yn cael ei ddifrodi i ffonio Heddlu Trafnidiaeth Prydeinig ar unwaith.”
Eglurodd Tomos Hughes, Swyddog Cefnogi Diffibrilwyr Mynediad Cyhoeddus gyda Gwasanaethau Ambiwlans Cymru: “Unwaith y bydd rhywun yn dioddef ataliad y galon mae pob munud yn cyfrif. Mae angen CPR arnynt ar unwaith gan y rhai o'u cwmpas yn ogystal â sioc gan ddiffibriliwr.
“Mae mor siomedig clywed am ddyfeisiau sydd wedi’u dwyn neu eu difrodi, sydd yn y bôn yn peryglu bywydau. Os mai chi yw’r fandal hwnnw, dychmygwch pe bai angen y diffibriliwr hwnnw ar aelod o’ch teulu mewn trawiad ar y galon – sut fyddech chi’n teimlo pe na bai ar gael? Peidiwch â bod y person hwnnw. Rydym yn annog unrhyw un sydd â gwybodaeth i gysylltu â’r heddlu.”
Ychwanegodd Adam Fletcher, Pennaeth BHF Cymru: “Mae pob eiliad yn cyfrif pan fydd rhywun yn cael ataliad y galon, ac, ochr yn ochr â CPR, mae defnydd prydlon o ddiffibriliwr yn hollbwysig er mwyn rhoi’r siawns orau iddynt oroesi. Yn syml, gallai mynediad at ddiffibriliwr fod y gwahaniaeth rhwng bywyd a marwolaeth, ac mae unrhyw un sy’n fandaleiddio diffibriliwr yn peryglu bywydau.”
Diffibrilwyr Pencoed:
