Peidiwch â thresmasu ar y rhwydwaith rheilffyrdd yng Nghymru a’r gororau

Mae Heddlu Trafnidiaeth Prydeinig (HTP), yn annog rhieni a gofalwyr ar draws Chymru ac ardal y gororau i rybuddio plant a phobl ifanc am beryglon tresmasu dros wyliau’r Pasg.

Gan fod ysgolion bellach ar gau ar gyfer y Pasg, mae swyddogion am atgoffa plant a phobl ifanc o'r peryglon o fod wrth ymyl y traciau a pheidio â gwneud traciau'r trenau'n faes chwarae.

Mae'r rhwydwaith rheilffyrdd yn gweithredu 24 awr y dydd gyda gwasanaethau teithwyr a nwyddau, gyda threnau'n teithio ar gyflymderau uchel iawn.  Mae rhan o'r rhwydwaith hefyd wedi'i drydaneiddio, gan ddargludo 25,000 o foltiau o drydan a all neidio o linellau uwchben.  Mae'r holl agweddau hyn yn creu amgylchedd hynod beryglus a all yn hawdd adael pobl ag anafiadau dinistriol sy'n newid bywyd, neu hyd yn oed arwain at farwolaeth.

Meddai Uwcharolygydd HTP Cymru a’r Gororau, Andrew Morgan:

“Mae llawer o blant a phobl ifanc yn edrych ar y rheilffordd fel lle cyffrous, ond mae’n bell ohoni.  Mae’r bobl hynny sydd yn gweithio ac yn gweithredu ar draws y rhwydwaith yn hynod fedrus ac yn ymgymryd â hyfforddiant cyson oherwydd gall yr amgylchedd fod yn lle marwol a byddwn i'n annog pob rhiant a gofalwr i gael sgyrsiau â’u hanwyliaid am y peryglon hyn.  Mae hefyd yn bwysig cofio bod tresmasu ar y rhwydwaith rheilffyrdd nid yn unig yn beryglus, ond mae hefyd yn anghyfreithlon.

“Fel gyda'r holl wyliau ysgol, rydym bob amser yn cynyddu ein patrolau yn ystod yr amseroedd hyn, gan chwilio'n rhagweithiol am y rhai sy’n torri’r gyfraith.  Byddwn i hefyd yn annog unrhyw aelod o’r cyhoedd sy’n gweld unrhyw un yn tresmasu i roi gwybod i ni drwy ein tecstio neu ein ffonio.  Mewn argyfwng, ffoniwch 999 bob tro.”

Ychwanegodd Leyton Powell, Cyfarwyddwr Cynaliadwyedd a Risg Trafnidiaeth Cymru:

“Nid yw byth yn werth cymryd risg trwy dresmasu, nid yn unig y mae’n anghyfreithlon ond gall arwain at anaf neu golled sylweddol. P’un a ydych chi’n chwarae gyda ffrindiau, yn cymryd llwybr byr neu’n gwneud ymarfer corff iach, peidiwch â gwneud hyn ar neu’n agos at reilffordd. Gall trenau ddynesu'n gyflym ac yn dawel a rhaid eu trin â pharch. Os ydych chi allan gyda ffrindiau neu os yw'ch plant yn mynd allan am y diwrnod, gwnewch y peth iawn a'u hatgoffa i aros yn ddiogel hefyd."

Gall pobl gysylltu â HTP drwy decstio 61016, drwy lawrlwytho’r Ap Railway Guardian neu drwy ffonio 0800 40 50 40, ffoniwch 999 bob tro mewn argyfwng.

Gellir rhoi gwybodaeth yn ddienw hefyd i’r elusen annibynnol Crimestoppers ar 0800 555 111.