Heddlu Trafnidiaeth Prydeinig yng Ngogledd Cymru yn rhybuddio am ddamweiniau fu bron â digwydd yng Nghonwy

Mae Heddlu Trafnidiaeth Prydeinig (BTP) yn annog aelodau'r cyhoedd i gymryd gofal a rhagofalon ychwanegol pan ydyn nhw allan dros gyfnod y Nadolig a'r Flwyddyn Newydd.  Yn benodol, mae BTP yn pryderu am y cynnydd mewn damweiniau fu bron â digwydd gyda threnau (pobl bron â chysylltu â thrên sy'n symud) yn ardal Conwy yng Ngogledd Cymru ac o'i hamgylch.

Dywedodd arolygydd Gogledd Cymru, Karl Anderson, o Heddlu Trafnidiaeth Prydeinig:

"Rydyn ni'n annog pawb i gymryd gofal ychwanegol wrth ddefnyddio croesfannau rheilffordd dros yr ŵyl ac i mewn i'r Flwyddyn Newydd.  Yr adeg yma o'r flwyddyn, mae'n bosib y bydd pobl allan yn dathlu cyfnod y Nadolig a'r Flwyddyn Newydd gydag alcohol yn gysylltiedig, sy'n gallu arwain at wneud penderfyniadau gwael.  Mae'r rhwydwaith rheilffyrdd yn gallu bod yn lle peryglus, a dyna pam mae angen i bobl wneud y peth iawn wrth ddefnyddio croesfan wastad ar y rheilffordd ac, o dan unrhyw amgylchiadau, ni ddylai unrhyw un byth dresmasu.  Mae tresmasu ar y rhwydwaith rheilffyrdd nid yn unig yn anghyfreithlon ac yn beryglus, ond gall fod yn farwol.

"Yn benodol, rydym wedi gweld cynnydd mewn damweiniau fu bron â digwydd ar y rhwydwaith rheilffyrdd rhwng Talacre a Llandulas yn ardal Conwy dros y misoedd diwethaf, felly byddem yn annog pwyll ychwanegol yn yr ardal hon yn benodol."