Dyn wedi'i garcharu am fastyrbio at fyfyriwr ar fwrdd trên - Huddersfield

Mae dyn 30 oed wedi’i garcharu ar ôl iddo ei gael yn euog o fastyrbio ar drên tra’n syllu ar fenyw ifanc.

Yn dilyn ymchwiliad gan Heddlu Trafnidiaeth Prydeinig, cafodd Amanj Mustafa, o Crossland Road, Huddersfield, ei ddedfrydu i chwe mis a hanner (26 wythnos) yn y carchar yn Llys Ynadon Kirklees ar ddydd Mawrth 17 Medi.

Cafodd hefyd Orchymyn Atal Niwed Rhywiol pum mlynedd, ei roi ar y Gofrestr Troseddwyr Rhyw am saith mlynedd a gorchymyn i dalu gordal o £154.

Clywodd y llys sut, ar ddydd Mawrth 7 Tachwedd y llynedd, fe wnaeth menyw 20 oed a oedd yn teithio ar wasanaeth o Leeds i Huddersfield sylwi ar Mustafa yn syllu arni.

Pan edrychodd hi eto funudau'n ddiweddarach gwelodd fod Mustafa'n dinoethi ei hun ac yn mastyrbio wrth edrych arni.

Fe wnaeth hi symud i gerbyd arall ond yn fuan wedyn fe'i dilynwyd gan Mustafa a eisteddodd ymhellach i fyny'r cerbyd a pharhau i syllu arni.

Pan adawodd hi'r trên yn Huddersfield, fe wnaeth Mustafa adael y trên ar ei hôl.
Fe wnaeth hi riportio beth oedd wedi digwydd ar unwaith i aelod o staff yr orsaf a roddodd wybod i Heddlu Trafnidiaeth Prydeinig.

Cafodd Mustafa ei adnabod o apêl yn y cyfryngau a rhoddodd ei hun i mewn.

Dywedodd y swyddog ymchwilio DC James Beasley: “Mae Mustafa yn ysglyfaethwr rhywiol a welodd gyfle i ddychryn a brawychu menyw ifanc.
“Er iddi hi symud i ffwrdd oddi wrtho, fe wnaeth Mustafa ei dilyn hi mewn ymgais arall i’w hanesmwytho.

“Yn ddealladwy, cafodd y fenyw ei gadael yn ofnus ac wedi'i chynhyrfu gan weithredoedd ffiaidd Mustafa a hoffwn i ddiolch iddi am riportio’r digwyddiad i ni.

“Rwy’n annog unrhyw un sy’n gweld neu’n profi aflonyddu rhywiol ar y rheilffordd i'w riportio i ni – nid oes unrhyw adroddiad yn rhy fach nac yn ddi-nod a byddwn ni bob amser yn eich cymryd o ddifrif. Tecstiwch ni ar 61016 neu ffoniwch 0800 40 50 40. Mewn argyfwng, ffoniwch 999 bob amser.”