Dyn wedi'i garcharu ar ôl ymosod ar blant - Casnewydd

Mae dyn wedi'i garcharu am 10 mis ar ôl ymosod ar ddau unigolyn yn eu harddegau ar drên a oedd yn agosáu at Gasnewydd, yn dilyn ymchwiliad gan Heddlu Trafnidiaeth Prydeinig.

Fe wnaeth William Loosley, 39, ac o Usk Way yng Nghasnewydd, bledio'n euog i ddau gyhuddiad o ymosod a chafodd ei ddedfrydu i 10 mis o garchar yn Llys Ynadon Casnewydd ar 10 Ebrill.

Hefyd fe wnaeth Jasmine Brine, 31, ac o Two Locks yng Nghwmbrân, bledio'n euog i un cyhuddiad o ymosod a chafodd orchymyn cymunedol am 12 mis, 100 awr o waith cymunedol di-dâl, gorchymyn ymatal 90 diwrnod, a £364 mewn costau llys a dioddefwr.

Clywodd y llys fod y ddau ddioddefwr yn eu harddegau yn dychwelyd i Gasnewydd o Fryste am oddeutu 11pm ar 1 Ebrill 2024 gyda’u ffrindiau.

Roedd Loosley a Brine yn eistedd ychydig resi y tu ôl i'r grŵp o bobl ifanc yn eu harddegau a gellid eu gweld ar TCC yn gwrando'n astud ar yr hyn yr oedden nhw'n ei ddweud.

Mae Brine yn cyhuddo’r grŵp o daflu caniau o gwrw o gwmpas, er na welwyd yr un ohonynt ar luniau TCC y trên. Dechreuodd hi weiddi ar y grŵp, gan daflu ei minlliw atynt.

Wrth iddi gerdded i ffwrdd, taflodd un yn y grŵp y minlliw yn ôl ac ymatebodd Brine drwy droi o gwmpas a gafael ym mhen y ferch yn ei harddegau.

Ymyrrodd y bachgen yn ei arddegau, gan geisio gwahanu Brine a'r ferch yn ei harddegau. Yna cerddodd Loosley drosodd yn gyflym, gan ddal y ferch yn ei harddegau i lawr wrth ddyrnu'r bachgen yn ei arddegau a gollodd ymwybyddiaeth am gyfnod byr.

Yn y diwedd cerddodd Loosley a Brine i ffwrdd oddi wrth y grŵp ond fe wnaethon nhw barhau i sarhau yn eiriol a gweiddi arnyn nhw nes i'r trên gyrraedd Casnewydd lle gadawodd y ddau y gwasanaeth.

Riportiwyd y digwyddiad i BTP, a chynhaliwyd ymholiadau brys. Arestiwyd Loosely a Brine y diwrnod canlynol ar amheuaeth o ymosod.

Dywedodd y swyddog ymchwilio DC Liam Perry: “Ni fydd ymddygiad treisgar, bygythiol na sarhaus yn cael ei oddef ar y rhwydwaith rheilffyrdd. Mae gan bob person hawl i deithio yn ddiogel ac yn gysurus, ac ni ddylai neb ddioddef ymddygiad brawychus a thrallodus mor ofnadwy ag a wnaeth y dioddefwyr.

“Roedd hwn yn ymosodiad ffiaidd a digymell gan ddau oedolyn ar bobl ifanc hanner eu hoedran allan gyda’u ffrindiau, a gallai’r anafiadau a gafwyd fod wedi bod yn sylweddol waeth. Rwy’n gobeithio y bydd cyfnod yn y carchar yn rhoi’r cyfle i Loosley fyfyrio ar ei weithredoedd a’r canlyniadau.”