Eich Darn Chi o'r Pos

Heddiw, dydd Llun 19 Chwefror, mae Heddlu Trafnidiaeth Prydeinig wedi lansio ymgyrch ymwybyddiaeth gyhoeddus drawiadol mewn ymgais i annog teithwyr rheilffyrdd i riportio aflonyddu rhywiol o bob math.

Mae ‘Eich Darn Chi o'r Pos’ yn defnyddio geiriau dioddefwyr go iawn yr arweiniodd eu gwybodaeth at droseddwr rhyw cyfresol yn cael ei ddal ar y rhwydwaith rheilffyrdd a’i gael yn euog o’i droseddau.

Mae'r ymgyrch yn dangos pa mor hanfodol yw pob adroddiad gan y cyhoedd a sut y gallai eich gwybodaeth, p'un a ydych yn ddioddefwr neu'n dyst, fod y darn olaf o'r pos sy'n helpu'r heddlu i ddal troseddwr cyfresol.

Mae dioddefwyr dewr wedi siarad am y tro cyntaf am sut roedd troseddwr yn eistedd wrth eu hymyl ar drên prysur ac wedi esgus addasu ei fag neu syrthio i gysgu er mwyn ymosod arnyn nhw.

Mae’r ymgyrch ‘Eich Darn Chio’r Pos’ yn dweud sut:

• Daeth yr adroddiad cyntaf gan fenyw a dynnodd lun yn ddewr o’r troseddwr pan adawodd hi'r trên ar ôl ymosodiad
• Roedd yr adroddiad canolog yn neges destun i 61016, a anfonwyd gan ddioddefwraig tra bod y troseddwr yn eistedd wrth ei hymyl. Yna fe wnaeth yr heddlu gyfarfod â'r trên ac arestio'r troseddwr 32 munud yn ddiweddarach.
• Tra roedd y troseddwr yn cael ei arestio, gwelodd aelod o'r cyhoedd yr hyn oedd yn digwydd a daeth ymlaen i ddatgelu ei fod wedi ymosod arni hi hefyd.

Mae eu hadroddiadau teimladwy o’u profiadau’n amlygu sut, er gwaethaf eu profi ar wahân, nad oeddent ar eu pen eu hunain a gyda’i gilydd trwy riportio i BTP, fe wnaethant sicrhau bod troseddwr rhyw cyfresol yn cael ei garcharu.

Datgelodd data a ryddhawyd ddiwedd y llyneddfod dros draean o fenywod wedi dioddef aflonyddu rhywiol neu droseddau rhywiol wrth gymudo ar drên neu diwb. Roedd yr arolwg, a gynhaliwyd gan Heddlu Trafnidiaeth Prydeinig, hefyd yn dangos bod 51% o’r rhai sydd wedi bod yn ddioddefwyr troseddau rhywiol yn dweud bod teithwyr eraill wedi ceisio eu helpu, ond dim ond un o bob pump o bobl sydd wedi bod yn dyst i aflonyddu rhywiol sydd wedi'i riportio i’r heddlu.

Dywedodd y Prif Gwnstabl Cynorthwyol Dros Dro, Paul Furnell:

“Gall pob darn o wybodaeth a gawn, boed gan y dioddefwr ei hun neu gan wyliwr, chwarae rhan mewn ymchwiliad ehangach yn erbyn unigolyn. Efallai eu bod wedi gwneud sylw rhywiol i chi ar y trên, ond y diwrnod cynt gallent fod wedi ymosod yn rhywiol ar rywun arall. Efallai mai eich gwybodaeth chi yw'r darn coll sy'n ein harwain i adnabod y troseddwr a sicrhau cyfiawnder i'w holl ddioddefwyr.

“Rydym yn gwybod nad yw’r troseddau hyn yn cael eu riportio yn ddigon aml am wahanol resymau. Mae dioddefwyr yn dweud wrthym eu bod yn amau eu hunain, neu eu bod yn teimlo bod yr hyn a ddigwyddodd iddynt yn ddibwys ac na fyddai’n werth riportio. Gyda’r ymgyrch hon rydym am amlygu'r ffaith na allai hyn fod ymhellach o’r gwirionedd.

“Mae gennym dasgluoedd ymroddedig a thimau arbenigol i ganfod ac ymchwilio ac nid ydym yn gadael unrhyw garreg heb ei throi o ran dod â throseddwyr o flaen eu gwell, ond mae angen i’r cyhoedd wneud yn siŵr eu bod yn riportio pob achos i ni fel y gallwn ni adnabod troseddwyr yn gyflym a’u tynnu oddi ar ein rhwydwaith.

“Rwyf am estyn fy niolch diffuant i’r holl ddioddefwyr a fu’n rhan o’n hymgyrch, gan adael i ni rannu eu geiriau a’u straeon mewn ymgais i annog eraill i wneud yr un peth.”

Sut i  riportio

Mae pob adroddiad yn bwysig. Mae pob adroddiad yn bwysig Ei weld neu ei brofi, gallwch riportio unrhyw beth sy'n eich gwneud yn anghyfforddus trwy decstio 61016, trwy'r ap Railway Guardian neu drwy ffonio 0800 40 50 40.

Gallwch chi hefyd riportio digwyddiadau'r gorffennol a riportio troseddau rhywiol yn ddienw yn btp.police.uk.

Mewn argyfwng, ffoniwch 999 bob amser.