Partneriaid yn ymuno ar gyfer wythnos o weithredu i fynd i'r afael â throseddau metel a gwastraff

Yr wythnos ddiwethaf, cymerodd swyddogion ac asiantaethau partner ledled y DU ran mewn wythnos genedlaethol o weithredu yn y frwydr barhaus yn erbyn troseddau metel a gwastraff.

Yn ystod yr wythnos, dan arweiniad Heddlu Trafnidiaeth Prydeinig, gwelwyd heddluoedd o bob cwr o'r wlad yn ymuno ag arbenigwyr o'r Cyd-Uned Troseddau Gwastraff (JUWC), Historic England, Network Rail, BT a sefydliadau seilwaith cenedlaethol eraill, i gyflawni camau gorfodi cydgysylltiedig.

Rhwng dydd Llun 12 a dydd Gwener 16 Hydref, daeth mwy na 45 o bartneriaid ynghyd i ghwblhau dros 500 o ymweliadau â delwyr metel sgrap, datgymalwyr cerbydau a safleoedd gwastraff anghyfreithlon, ac i stopio dros 800 o gerbydau.

Gwnaed chwe arestiad, nodwyd 70 o warediadau y tu allan i'r llys am droseddau, ymchwiliwyd i 69 o droseddau eraill ac adferwyd deg llwyth o eiddo wedi'i ddwyn.

Yn ystod yr ymweliadau a'r gwiriadau hyn, bu swyddogion yn chwilio am fetel wedi'i ddwyn, ac yn archwilio cofnodion ariannol masnachwyr i sicrhau eu bod yn cydymffurfio â'r Ddeddf Delwyr Metel Sgrap

Cyfrannodd cyflwyno'r ddeddfwriaeth yn 2013, a gyflwynodd gofynion trwyddedu llym ar ddelwyr a gwiriadau hunaniaeth i bobl sy'n gwerthu metel sgrap, at ostyngiad sylweddol mewn dwyn metel.

Er gwaethaf hyn mae dwyn wedi parhau, wrth i rai troseddwyr fanteisio ar rwydwaith tawelach yn ystod y pandemig Covid-19 i dargedu lleoliadau ynysig.

Fel rhan o'r wythnos, cynhaliodd y JUWC gyfres o archwiliadau safleoedd gwastraff i sicrhau bod busnesau'n dal trwyddedau amgylcheddol ac yn diwallu gofynion cyfreithiol eraill.

Mae'r tasglu, a lansiwyd ym mis Ionawr 2020, yn dwyn ynghyd asiantaethau gorfodi'r gyfraith, rheoleiddwyr amgylcheddol, Cyllid a Thollau EM a'r Asiantaeth Troseddu Genedlaethol i dargedu'r rhai sy'n delio â throseddau difrifol a threfnedig ym maes gwastraff. Mae'r cyflawnwyr hyn yn aml yn ymwneud â gweithgareddau troseddol trefnedig eraill, gan gynnwys troseddau metel.

Ymhlith y sectorau y mae troseddau metel a gwastraff yn effeithio'n ddifrifol arnynt mae trafnidiaeth, pŵer a thelathrebu. Mae safleoedd treftadaeth, gan gynnwys addoldai, hefyd yn cael eu targedu fwyfwy wrth i fetel gael ei ddwyn o doeau ac allorau, gan achosi difrod strwythurol anadferadwy a cholled hanesyddol.

Dywedodd Arweinydd Cenedlaethol Heddlu Trafnidiaeth Prydeinig ar gyfer Troseddau Metel, yr Uwch-arolygydd Mark Cleland: “Nod yr wythnos oedd rhoi sylw ar y gwaith cadarnhaol sy’n cael ei wneud i fynd i’r afael â throseddau metel a gwastraff, annog pobl i riportio digwyddiadau a rhybuddio darpar droseddwyr y byddwn yn gweithredu yn eu herbyn.

“Rydym yn gweithio gyda phartneriaid ledled y wlad a ledled y diwydiant ailgylchu metelau i dargedu'r rhai rydym yn amau eu bod yn diystyru'r gyfraith neu'n gweithredu y tu allan i'w trwydded.

“Trwy fabwysiadu ymagwedd amlasiantaethol, rydym yn cynyddu ein gallu i adnabod y rhai sy'n ymosod ar ein seilwaith cenedlaethol a'n hadeiladau hanesyddol, gan ei gwneud yn anoddach iddynt werthu metel wedi'i ddwyn ac elwa o'u gweithgareddau.”

Dywedodd y Gweinidog Troseddu a Plismona, Kit Malthouse:“Gall troseddau metel a gwastraff gael effaith sylweddol ar y rhai sy’n cael eu targedu.

“Rwf y’n croesawu’r wythnos hon o weithredu, sydd wedi gweld partneriaid yn sicrhau canlyniadau sylweddol gyda’i gilydd i fynd i’r afael â throseddau metel.

“Mae’r Ddeddf Delwyr Metel Sgrap yn parhau i fod yn arf pwerus yn y frwydr yn erbyn y math hwn o droseddoldeb.”

Dywedodd Phil Davies, swyddog gorfodi JUWC:“Mae'r ymgyrch hon yn dangos sut mae'r Cyd-uned ar gyfer Troseddau Gwastraff yn dod â gwahanol asiantaethau ynghyd o bob rhan o'r DU i atal troseddwyr sydd nid yn unig yn ymwneud â throseddau gwastraff ond hefyd â llawer o weithgareddau anghyfreithlon eraill sy'n effeithio'n ddifrifol ar gymunedau a'r amgylchedd.

Rydym yn gwybod y bydd troseddwyr yn defnyddio gwahanol fathau o wastraff fel modd i sicrhau enillion ariannol sylweddol, a thrwy ddefnyddio adnoddau a phwerau cyfun gwahanol asiantaethau, byddwn yn parhau i dargedu, aflonyddu a dwyn y mentrau troseddol hyn o flaen eu gwell.”

Dywedodd Mark Harrison, Pennaeth y Strategaeth Troseddu Treftadaeth yn Historic England:“Mae dwyn metel o adeiladau eglwysig hanesyddol yn droseddu difrifol a threfnedig. Mae tynnu darnau mawr o blwm neu gopr o doeau nid yn unig yn cael effaith ariannol ddifrifol ar gymunedau eglwysig, ond hefyd yn cael effaith enfawr ar eu morâl.

“Bydd gan y metel a gafodd ei ddwyn werth hanesyddol a diwylliannol ac mae ei dynnu'n arwain at ddifrod anadferadwy i safleoedd ac adeiladau hanesyddol gwarchodedig, a dyna pam mae mynd i’r afael â’r broblem hon mor bwysig.

“Yn Historic England rydym yn gweithio gyda phartneriaid i asesu graddfa’r broblem dwyn metel ledled y wlad ac yn datblygu ymagwedd genedlaethol gydgysylltiedig tuag at amddiffyn yr eglwysi hynny sydd â’r risg uchaf o brofi troseddu.

“Yn ogystal â chomisiynu dadansoddiad manwl o’r math hwn o drosedd mewn cydweithrediad â Heddlu Caint ac OPAL - yr Uned Cudd-wybodaeth Genedlaethol ar gyfer Troseddu Caffael Difrifol a Threfnedig, wedi'i lleoli gyda Heddlu West Mercia ac Arweinwyr Cenedlaethol yr Heddlu ar gyfer Troseddu Treftadaeth ac Eiddo Diwylliannol a Dwyn Metel, rydym yn datblygu cyfres o fesurau i sicrhau ein bod yn y sefyllfa orau i atal ac ymchwilio i'r math treiddiol hwn o droseddoldeb.

“Bydd hyn yn cynnwys hyfforddiant i dimau heddlu lleol i nodi metel treftadaeth sydd wedi’i ddwyn pan ydynt ar ddyletswydd, annog delwyr metel sgrap, mwyndoddwyr ac iardiau achub i gysylltu â’r awdurdodau pan gânt gynnig deunyddiau yr amheuir eu bod wedi'u dwyn, a sicrhau bod gan eglwysi a chymunedau fynediad at gyngor arbenigol a fydd yn caniatáu iddynt asesu risg a gweithredu mesurau ataliol effeithiol.

"Yn ei dro bydd y camau hyn yn galluogi cynulleidfaoedd a chymunedau lleol i leihau’r difrod a’r golled os ymosodir arnynt neu drefnu’r mesurau angenrheidiol i atal troseddu'n gyfan gwbl. Bydd yr asesiad yn cael ei gydlynu gan Andy Bliss, cyn Brif Gwnstabl Heddlu Swydd Hertford, Mark Harrison, Pennaeth y Strategaeth Troseddu Treftadaeth ar gyfer Historic England a bwrdd o ymarferwyr arbenigol.”

Cyngor ar sut i atal troseddau metel a gwastraff:

• Riportiwch unrhyw weithgaredd amheus– Os gwelwch unrhyw weithgaredd amheus, riportiwch ef i'r heddlu trwy ffonio 101, neu 999 os oes trosedd ar y gweill. Os gwelwch rywbeth ar y rheilffordd, cysylltwch â BTP trwy anfon neges destun at 61016 neu ffonio 0800 40 50 40. Dylid cyflwyno adroddiadau am droseddau metel a gwastraff cyn gynted â phosibl er mwyn cynyddu'r siawns o ganfod.
• Gwnewch ef yn anoddach i'w ddwyn - Mae mynd i'r afael â'r drosedd yn ymwneud ag atal cymaint â chanfod. Rydym yn annog pobl i aros yn wyliadwrus ac ystyried mesurau diogelwch i amddiffyn asedau metel, megis storio mewn lleoedd diogel a buddsoddi mewn dyfeisiau diogelwch.
• Gwnewch ef yn anoddach cael gwared arno - Mae marcio eiddo yn ei gwneud yn anoddach cael gwared â metel ac yn helpu'r heddlu i'w olrhain os yw wedi'i ddwyn. Mae marcio eiddo ar gael ar gyfer y mwyafrif o asedau metel o drawsnewidwyr catalytig i arteffactau hanesyddol.