Tasglu Llinellau Cyffuriau BTP - Ei rôl, ei ganlyniadau a'i ymdrechion i fynd i'r afael â gangiau

Mae Heddlu Trafnidiaeth Prydeinig wedi bod yn cyflawni ymgyrchoedd Llinellau Cyffuriau ledled Cymru, Lloegr a'r Alban ers iddo sicrhau cyllid y Swyddfa Gartref ar gyfer Tasglu ym mis Rhagfyr 2019.
Prif nodau'r Tasglu yw mynd i'r afael â chyffuriau ar y rhwydwaith rheilffyrdd, ac amddiffyn plant ac oedolion bregus sy'n aml yn cael eu hecsbloetio gan gangiau i werthu neu symud cyffuriau.

Gwneir ymdrechion i ddiogelu unrhyw berson bregus neu sydd wedi'i ecsbloetil a arestiwyd fel rhan o Linellau Cyffuriau, gan eu hatgyfeirio i wasanaethau a grëwyd i annog a chefnogi'r unigolyn i ffwrdd o weithgarwch troseddol peryglus.
Mae tri deg pedwar o bobl fregus wedi cael eu hatgyfeirio i'r Mecanwaith Atgyfeirio Cenedlaethol i'w diogelu hyd yma.

Hefyd roedd bron i 640 o arestiadau, roedd 329 o atafaeliadau o gyffuriau, atafaelwyd 110 o arfau ac atafaelwyd £241,000 mewn arian parod.
Mae BTP wedi partneru gyda Chymdeithas y Plant a’u hymgyrch ymwybyddiaeth #LookCloser i annog gweithwyr proffesiynol a’r cyhoedd i ‘Edrych yn Agosach’ am arwyddion y gallai plentyn fod mewn perygl o gael ei ecsbloetio’n droseddol.

Mae wedi'i anelu at unrhyw un a allai ddod ar draws plant yn eu bywydau beunyddiol, gan gynnwys gweithwyr y sector gwasanaeth a gweithwyr trafnidiaeth, gan mai lleoedd cyhoeddus yn aml yw lle mae plant sy'n cael eu hecsbloetio'n fwyaf gweladwy. Mae arwyddion allweddol o ecsbloetioyn cynnwys plant sy'n teithio ar eu pennau eu hunain, yn arbennig yn ystod oriau ysgol, yn hwyr yn y nos neu yn rheolaidd. Hefyd gall ymddangos eu bod ar goll neu mewn amgylchedd anghyfarwydd ac efallai eu bod yn cario symiau mawr o arian.

Dywedodd arweinydd y Tasglu, y Ditectif Uwch-arolygydd Gareth Williams: “Mae ein Tasglu mewn sefyllfa unigryw, rydym yn gweithredu’n genedlaethol ac yn targedu gweithgarwch Llinellau Cyffuriau ar draws y rhwydwaith reilffyrdd.

“Mae ein profiad wedi profi bod gangiau sy’n defnyddio’r rhwydwaith reilffyrdd yn dibynnu ar bobl iau i symud cyffuriau. Mae'r unigolion hyn yn ddioddefwyr, yn cael eu gorfodi trwy ecsbloetio neu ddychryn i sefyllfaoedd enbyd, a'n blaenoriaeth bob amser yw sicrhau bod cefnogaeth ar gael a all eu cael allan o niwed ac i ffwrdd o droseddu.

“Ers mis Rhagfyr, rydym wedi bod yn cynnal ymgyrchoedd yn ddyddiol, bob amser yn seiliedig ar ddatblygu cudd-wybodaeth sy’n dangos lle mae gangiau’n gweithredu. Rydym yn cael rhan o'n gwybodaeth trwy weithio mewn partneriaeth ag asiantaethau gorfodi'r gyfraith eraill, ond hefyd yn bwysig trwy gefnogaeth y diwydiant rheilffyrdd sy'n hyfforddi eu staff i nodi arwyddion o ecsbloetio.

“Mae’r ymdrechion hyn i godi ymwybyddiaeth o arwyddion o ecsbloetio wedi cael cymorth mawr gan waith Cymdeithas y Plant y mae ei hymgyrch #LookCloser yn anelu at annog pawb i sylwi ar arwyddion allweddol. “

Ymhlith y dangosyddion allweddol mae person ifanc yn ei arddegau yn teithio pellteroedd maith, ar ei ben ei hun gyda swm mawr o arian parod, neu'n osgoi unrhyw fath o awdurdod mewn gorsafoedd. Mae'r dangosyddion hyn yn fach ond yn amhrisiadwy ac yn helpu i lywio ble rydym yn targedu nesaf. Mae gennym ddealltwriaeth sy'n datblygu'n gyflym o droseddu Llinellau Cyffuriau ac rydym yn barod i fynd i'r afael ag ef, lle bynnag y mae'r gudd-wybodaeth yn ein harwain.