Heddlu Trafnidiaeth Prydeinig yn rhoi hwb i batrolau ar wasanaethau yn ystod y nos mewn strategaeth diogelwch newydd i fenywod yn y nos

Bydd teithwyr yn gweld mwy o bresenoldeb gan yr heddlu ar drenau ac mewn gorsafoedd yn y nos fel rhan o ymgyrch bwrpasol gyda'r nod o gadw menywod yn ddiogel ar y rhwydwaith rheilffyrdd.

Mae strategaeth yr heddlu wedi'i thargedu at roi sicrwydd i fenywod sy'n teithio yn y nos, gyda phatrolau amlwg ac anrhagweladwy iawn yn ymgymryd â gweithgarwch ymgysylltu a gorfodi i fynd i'r afael â throseddu neu ymddygiad sy'n gwneud i fenywod deimlo'n anniogel.

Dechreuodd y cynnydd mewn gweithgarwch yn gynharach y mis hwn a bydd yn rhedeg ar draws yr ŵyl ac i'r flwyddyn newydd ledled Cymru, Lloegr a'r Alban.

Mae'n dod wrth i BTP barhau i fynd i'r afael â throseddau rhywiol ac aflonyddu rhywiol ar y rheilffordd, gan annog teithwyr sy'n profi neu'n gweld yr ymddygiad hwn, megis cyffwrdd, cilwenu, dinoethi anweddus, a thynnu lluniau i fyny sgertiau i'w riportio drwy siarad â'n swyddogion neu decstio 61016.

Meddai'r Prif Gwnstabl Cynorthwyol BTP Allan Gregory: "Mae gan bawb yr hawl i deimlo'n ddiogel wrth deithio ar y rhwydwaith ac rydym yn arbennig o ymroddedig i sicrhau bod hyn yn wir am fenywod yn y nos.

"Nod y cynnydd yn nifer y bobl sy'n bresennol ar drenau ac mewn gorsafoedd yw atal troseddwyr rhywiol a rhoi sicrwydd i unrhyw un sy'n teithio ar wasanaethau yn ystod y nos.

"Rwy'n annog unrhyw un sy'n teimlo'n anniogel neu sydd am rriportio digwyddiad i gysylltu â'n swyddogion. Rydym yma i chi. Nid oes dim yn rhy fach nac yn rhy ddibwys a byddwn bob amser yn eich cymryd o ddifrif."