Diffibriliwr newydd yn achub bywyd yng ngorsaf Caerdydd Canolog

Ar ddechrau mis Ebrill 2023, defnyddiwyd diffibriliwr oedd newydd ei osod i achub bywyd dyn yng Ngorsaf Rheilffordd Caerdydd Canolog. 

Gwelwyd dyn anymwybodol yn yr orsaf a defnyddiodd dau o Swyddogion Heddlu Trafnidiaeth Prydeinig y diffibriliwr ar ôl defnyddio CPR.Cymerodd parafeddygon y gweithdrefnau drosodd pan gyrhaeddon nhw ac aethpwyd â'r dyn i'r ysbyty i wella.

Dywedodd Uwch-arolygydd Heddlu Trafnidiaeth Prydeinig, Andrew Morgan:

“Mae diffibrilwyr yn adnodd cymunedol anhygoel ac yn achub bywydau o wythnos i wythnos.  Rwy’n cymeradwyo ac yn diolch i’n dau swyddog a oedd yn rhan o’r digwyddiad hwn ac fe wnaeth eu meddwl cyflym a’u hyfforddiant wir wahaniaeth yn y pen draw. Rwyf hefyd yn ategu'r pryderon a godwyd  gan Trafnidiaeth Cymru ynghylch fandaliaeth ddifeddwl y cynhyrchion hyn sy'n achub bywydau.

“Os ydych yn amau bod rhywun yn cael trawiad ar y galon, ffoniwch 999 ar unwaith a gofynnwch am y gwasanaeth Ambiwlans, dechreuwch CPR a gofynnwch i rywun ddod o hyd i ddiffibriliwr. Bydd y gweithredwr 999 yn rhoi cyngor i chi ar sut i gyflwyno CPR os nad ydych chi'n gwybod sut i wneud hynny, a ble i ddod o hyd i’r diffibriliwr agosaf os na allwch chi ddod o hyd i un. Wedyn bydd y gweithredwr hefyd yn rhoi cyngor i chi ar sut i'w ddefnyddio. Bydd y gweithredoedd hyn yn gwneud gwahaniaeth mawr ac fel y tro hwn, gallan nhw achub bywydau.”

Dywedodd Leyton Powell, Cyfarwyddwr Diogelwch, Cynaliadwyedd a Risg:

“Mae Trafnidiaeth Cymru wedi gosod dros 200 o ddiffibrilwyr ar draws ein rhwydwaith rheilffyrdd ac mae hon yn enghraifft glir o ba mor bwysig ydyn nhw a sut y gallan nhw achub bywydau.

“Yn anffodus, mewn llawer o’n gorsafoedd, mae ein diffibrilwyr wedi cael eu fandaleiddio ac rwy’n gobeithio bod y stori hon yn amlygu’r rôl hanfodol y gallan nhw ei chwarae ac y bydd yn gwneud i bobl feddwl ddwywaith cyn difrodi darn o offer sy’n achub bywydau.

“Eleni, rydyn ni wedi gweithio gyda’n partneriaid yn Achub Bywyd Cymru a Gwasanaeth Ambiwlans Awyr Cymru i gynnal digwyddiadau ymwybyddiaeth o ddiffibrilwyr yng ngorsafoedd Caerdydd a Wrecsam a byddwn ni'n parhau i amlygu eu pwysigrwydd wrth symud ymlaen.”

Mae diffibrilwyr yn ddyfeisiadau cludadwy y gellir eu defnyddio i roi sioc drydanol i'r galon. Gall eu defnydd cyflym olygu'r gwahaniaeth rhwng achub bywyd rhywun a pheidio. Os defnyddir diffibriliwr gyda 3-5 munud o ataliad y galon, gall y siawns o oroesi gynyddu hyd at 70%.