Dau ddyn wedi'u dedfrydu am ddwyn trawst rheilffordd – Casnewydd

Mae dau ddyn wedi cael dedfrydau gohiriedig am geisio dwyn gwerth bron i £20,000 o drawstiau rheilffordd o ddepo ger Casnewydd, yn dilyn ymchwiliad gan Heddlu Trafnidiaeth Prydeinig.

Fe wnaeth Colwyn Price, 52, ac o Greenway Road yng Nghaerdydd, a Wayne Price, 48, o Rover Way yng Nghaerdydd, bledio'n euog i un cyhuddiad o gynllwynio i ddwyn ac un cyhuddiad o ddwyn trawstiau dargludydd rheilffordd.

Dedfrydwyd Colwyn Price yn Llys y Goron Caerdydd ar 26 Medi i 15 mis o garchar wedi’i ohirio am 24 mis, gorfodwyd ef i dalu ffi gordal dioddefwr o £187, a rhaid iddo gwblhau 150 awr o waith di-dâl.

Dedfrydwyd Wayne Price yn yr un llys i 15 mis o garchar wedi'i ohirio am 24 mis, gorfodwyd ef i dalu ffi gordal dioddefwr o £187, a fforffedu'r lori a ddefnyddiwyd yn ystod y lladrad.

Clywodd y llys sut, ar ddydd Iau 24 Tachwedd 2022 mewn depo rheilffordd yn ardal Casnewydd, y gwelwyd Colwyn a Wayne yn ceisio dwyn gwerth bron i £20,000 o drawstiau dargludyddion alwminiwm.

Fe wnaeth swyddogion o dasglu ar y cyd rhwng Heddlu De Cymru a Heddlu Gwent fynychu'r depo gan geithredu ar gudd-wybodaeth yn ymwneud â cherbydau a ddefnyddiwyd i drefnu dwyn peiriannau a sgrap yn yr ardal.

Wrth gyrraedd a defnyddio drôn, gwelwyd dynion yn gosod rheiliau metel ar gefn lori cyn dringo i mewn i'r cerbyd a gyrru allan o'r caeadle.

Dechreuodd swyddogion ddilyn y lori mewn ceir heb eu marcio, cyn ceisio stopio'r cerbyd yn ddiweddarach. Methodd y lori â stopio, gan geisio arafu ceir yr heddlu a'u hatal rhag goddiweddyd.

Yn fuan llwyddodd y ceir heddlu oedd ar ei drywydd i oddiweddyd a rhwystro’r ffordd, gan stopio’r lori. Fe wnaeth Colwyn a Wayne Price adael y cerbyd a chawsant eu harestio ar amheuaeth o ddwyn a chynllwynio i ddwyn, a throsglwyddwyd yr ymchwiliad i BTP.

Dywedodd y swyddog ymchwilio DC Liam Perry: “Mae dwyn metel yn parhau i fod yn fusnes mawr i ladron manteisgar sy’n gweld y rheilffordd fel targed hawdd, a byddwn ni'n parhau i ymchwilio ac erlyn yr unigolion hynny’n ddidrugaredd.

“Rydym wedi ymrwymo i fynd i’r afael â phob math o ladrad a byddwn ni'n parhau i weithio’n agos gyda Network Rail a’n partneriaid eraill i wneud y rheilffyrdd yn lle digroeso i droseddwyr weithredu ynddo.”

Colwyn Price

Wayne Price