Dyn wedi'i garcharu am ymosod, cam-drin hiliol, a bygythiadau gyda chyllell - Plymouth

Mae dyn wedi'i garcharu am dros ddwy flynedd ar ôl bygwth aelodau o’r cyhoedd gyda chyllell a cham-drin eraill yn hiliol, ymosod ar swyddog heddlu, a dwyn o siop a’i difrodi.

Cafwyd Jonathan Shotter, 43, ac o Obelisk Road yn Southampton, yn euog o ddwyn o siopau, achosi difrod troseddol, meedu ar a bygwth gyda chyllell, ymosod ar weithiwr gwasanaethau brys, trosedd trefn gyhoeddus a throsedd trefn gyhoeddus a waethygwyd gan hiliaeth.

Dedfrydwyd Shotter yn Llys y Goron Southampton ar 8 Awst i 27 mis o garchar, a gorfodwyd ef i dalu £228 mewn costau a fforffedu'r gyllell.

Ar 29 Hydref 2023 yng ngorsaf reilffordd Plymouth, aeth Shotter i mewn i siop yn yr orsaf a dwyn gwerth ychydig dros £20 o fwyd. Ceisiodd fynd yn ôl i mewn i'r siop ychydig yn ddiweddarach ond gofynnodd y staff iddo adael.

Cynhyrfodd Shotter, gan fynd yn ymosodol tuag at staff y rheilffordd a gorfodi'r siop i gau ei chaeadau er mwyn amddiffyn y staff a oedd ar ôl y tu mewn iddi. Aeth ymlaen i ysgwyd, dyrnu, a chicio'r caead, gan ei niweidio.

Yn dilyn hyn, chwifiodd Shotter gyllell a dechreuodd gerdded o amgylch yr orsaf a’r platfformau gan fygwth aelodau o staff a smalio taflu’r gyllell at aelodau’r cyhoedd.

Fe wnaeth Shotter fygwth yn uniongyrchol i drywanu sawl aelod o staff, gan gynnwys dweud wrth aelod o staff a oedd yn gweithio ar linell y giât y byddai’n ei drywanu yn ei ben.

Fe gododd y gyllell hefyd i wyneb bachgen pump oed cyn mynd ymlaen i weiddi iaith hiliol sarhaus tuag at aelodau eraill o’r cyhoedd, gan bwyntio’r gyllell i’w cyfeiriad a’u bygwth.

Pan gyrhaeddodd swyddogion, gosododd Shotter y gyllell ar y llawr a chafodd ei arestio. Tra'n cael ei chwilio yn dilyn ei arestio, fe wnaeth benio un o'r swyddogion a oedd yn bresennol.

Dywedodd y swyddog ymchwilio DC Adam Rudling: “Rwy’n fodlon iawn ar y canlyniad yn yr achos hwn. Fe wnaeth Shotter ymddwyn yn ymosodol iawn tuag at staff y rheilffordd, swyddogion heddlu ac aelodau'r cyhoedd. Ni fydd ymddygiad treisgar a difrïol yn cael ei oddef yn unrhyw le ar y rhwydwaith rheilffyrdd.

“Rwy’n gobeithio bod y ddedfryd hon yn rhoi’r cyfle i Shotter fyfyrio ar ei weithredoedd a’r canlyniadau sy’n dilyn, ac rwy'n gobeithio ymhellach y bydd yn gweithredu fel rhybudd i unrhyw un a fyddai’n ceisio bygwth, niweidio neu gam-drin eraill.”