Dyn wedi'i garcharu ar ôl ymosod yn greulon ar ddyn ar blatfform - Sheffield

Mae dyn wedi’i garcharu am ddwy flynedd ar ôl iddo gicio dyn yn ei ben dro ar ôl tro tra’r oedd yn gorwedd ar y ddaear, yn dilyn ymchwiliad gan Heddlu Trafnidiaeth Prydeinig.

Plediodd Kieron Hall, 24, ac o Adwick Le Street yn Doncaster, yn euog mewn gwrandawiad ym mis Hydref i geisio achosi niwed corfforol difrifol a chafodd ei ddedfrydu yn Llys y Goron Sheffield ar 27 Mawrth i ddwy flynedd o garchar a’i orfodi i dalu gordal dioddefwr o £228.

Clywodd y llys bod Hall ar y platfform yng ngorsaf reilffordd Sheffield ar 13 Ionawr 2024 ac roedd yn tafodi rhywun ar y ffôn yn uchel ac yn ymosodol.

Wynebodd aelod o'r cyhoedd Hall am ei iaith, gan dynnu sylw at y ffaith bod plant a theuluoedd ar y platfform. Parhaodd Hall i weiddi enllibion geiriol i lawr y ffôn, a gofynnodd yr aelod o’r cyhoedd eto i Hall feddwl am ei iaith.

Fe wnaeth Hall ddyrnu'r aelod o'r cyhoedd yn ei ben, gan achosi iddo syrthio i'r llawr. Wrth iddo syrthio, dyrnodd Hall ef eto yn ei ben. Unwaith yr oedd yn gorwedd ar y llawr, aeth Hall ati i'w gicio sawl gwaith yn ei ben cyn iddo gael ei atal gan aelodau eraill o'r cyhoedd.

Wrth i Hall droi i adael, rhedodd yn ôl tuag at y dyn ar y llawr a'i gicio yn ei ben gyda grym llawn un tro olaf. Yna cafodd ei gadw gan PCSO a swyddogion diogelwch yr orsaf cyn cael ei arestio gan swyddog BTP.

Dywedodd y swyddog ymchwilio DC Sam Killerby: “Roedd Kieron yn hynod ffodus nad oedd ei weithredoedd wedi arwain at rywun yn colli ei fywyd. Roedd ei ymosodiad yn greulon a heb ei ysgogi, a gobeithio y bydd ei amser yn y carchar yn rhoi amser iddo fyfyrio ar ffolineb ei weithredoedd.

“Nid ydym yn goddef ymddygiad treisgar nac ymosodol ar y rhwydwaith rheilffyrdd, a hoffem atgoffa’r cyhoedd y gallant riportio unrhyw droseddau neu bryderon sydd ganddynt trwy decstio 61016 fel y gallwn ni weithredu. Mewn argyfwng ffoniwch 999 bob amser.”