Diweddariad ar ymchwiliad gorsaf Victoria - Llundain

Gall Heddlu Trafnidiaeth Prydeinig (BTP) gadarnhau na fydd unrhyw gamau pellach yn cael eu cymryd mewn perthynas â digwyddiad yng ngorsaf Victoria Llundain ym mis Mawrth, yn dilyn ymchwiliad llawn a thrylwyr.

Ar 11 Mai, adroddwyd wrth BTP bod rhywun wedi poeri a phesychu ar fenyw 47 oed, Belly Mujinga, wrth iddi weithio yn y neuadd docynnau gyda dau gydweithiwr ar 21 Mawrth.   

Yn drist iawn, bu farw ar 5 Ebrill yn yr ysbyty, ar ôl profi’n bositif am Goronafeirws.

Mae ditectifs wedi cynnal ymholiadau helaeth i sefydlu amgylchiadau llawn yr hyn a ddigwyddodd ar 21 Mawrth. Mae hyn wedi cynnwys adolygu ffilm teledu cylch cyfyng o'r digwyddiad a siarad â thystion allweddol.

Yn dilyn adolygiad o’r holl wybodaeth, mae uwch dditectifs wedi dod i’r casgliad nad oes tystiolaeth i gadarnhau bod unrhyw droseddau wedi digwydd, ac nad oedd marwolaeth drasig Belly Mujinga yn ganlyniad i’r digwyddiad hwn.

O ganlyniad, ni fydd y mater yn cael ei atgyfeirio i Wasanaeth Erlyn y Goron.

Ni chymerir unrhyw gamau pellach yn erbyn dyn 57 oed o Lundain a gafodd ei gyfweld mewn cysylltiad â'r mater hwn.

Mae teulu Belly wedi'u hysbysu o ganlyniad yr ymchwiliad a byddant yn parhau i gael eu cefnogi gan swyddogion arbenigol.

Dywedodd y Ditectif Brif Arolygydd Sam Blackburn:“Rwyf yn gwybod bod colli Belly wedi effeithio ar gymaint o bobl, a gallaf eich sicrhau ein bod wedi gwneud popeth o fewn ein gallu i ddarparu atebion i’w theulu.

“O ganlyniad i’n hymholiadau, gallwn nawr fod yn hyderus na arweiniodd y digwyddiad hwn at farwolaeth drasig Belly.

“Mae ein meddyliau’n aros gyda’i theulu a byddwn yn parhau i’w cefnogi wrth iddynt ddod i delerau â cholli eu mam a’u gwraig annwyl.”