Gwahodd y cyhoedd i Gerdded a Siarad â Heddlu Trafnidiaeth Prydain i gynyddu sicrwydd a diogelwch

Mae cynllun peilot a sefydlwyd i dawelu meddyliau'r cyhoedd wedi lansio ym Manceinion gyda theithwyr rheilffordd yn cael eu gwahodd i fynd ar daith o amgylch gorsaf Piccadilly ar 'Daith Gerdded a Siarad' gyda swyddogion.

Mae'r cynllun, a lansiwyd fel rhan o'r fenter Plismona yn y Gymdogaeth, yn rhedeg mewn 10 gorsaf ganolfan brysur ledled y wlad ar hyn o bryd.

Mae swyddogion o dimau plismona yn y gymdogaeth yn cynnal y teithiau tywys, gan ganiatáu i'r person gyfarwyddo'r sesiwn i gyd-fynd â'i anghenion.

Mae timau plismona yn y gymdogaeth wrth wraidd plismona ar y rheilffordd – nhw yw'r swyddogion rheng flaen y byddwch yn eu gweld o ddydd i ddydd. Eich gorsaf yw eu cymuned sy'n eu gwneud mewn sefyllfa berffaith i fynd gyda'r cyhoedd, gwrando ar eu pryderon a chynnig sicrwydd.

Dywedodd PC Andy Margerison: "Rydym yn cwrdd â'r person y tu allan i'r orsaf ac yn trafod yr hyn y maent yn gobeithio ei gael o'r daith. Maent yn esbonio pam eu bod wedi cofrestru ac rydym yn ei gymryd o'r fan honno. Gallwn gerdded o amgylch pob rhan o'r orsaf gyda nhw os mai dyna pam mae angen a'r allwedd i hynny yw esbonio nad ydynt byth yn bell o help neu gymorth – boed yn BTP, staff gorsaf, glanhawyr – rydym i gyd yn rhan o deulu'r rheilffordd.

Ychwanegodd PC Abby Chesters: "Mae'n gyfle i ni ymgysylltu â'r cyhoedd un i un a gwneud gwahaniaeth mawr. Mae'n rhoi cyfle i ni eu sicrhau nad ydynt byth yn bell o help na chymorth hyd yn oed mewn gorsaf brysur fel Piccadilly. Mae hefyd yn caniatáu i'r person fynegi i ni unrhyw leoedd nad ydynt yn teimlo'n ddiogel a pham."

Mae'r gwahoddiad hefyd yn ymestyn i ddioddefwyr troseddau, nid yn unig ar y rheilffordd, a allai ddymuno magu hyder i ailddechrau teithio, siarad am yr hyn a ddigwyddodd iddynt a sut maent yn teimlo am ymweld â'r orsaf.

Roedd un fenyw a gysylltodd â'r tîm i drefnu Taith Gerdded a Siarad â swyddogion yn ddioddefwr cam-drin domestig a oedd wedi colli pob hyder ac nad oedd wedi mentro allan o'i hardal ers amser maith.

Dywedodd PC Margerison: "Roedd hyn yn bosibilrwydd brawychus iawn i'r fenyw hon, ond roedd hi'n ddigon dewr i gymryd y cam hollbwysig cyntaf hwnnw ac rydw i mor falch ein bod ni wedi gallu ei helpu i wneud hynny.

"Mi wnes i a PC Chesters ei chyfarfod yn yr orsaf a buom yn siarad am ei phrofiad a pham ei bod yn teimlo ei bod yn bryd cymryd y cam cyntaf hwnnw."

Mewn adborth a roddwyd i'r swyddogion, eglurodd: "Roedd yn ymwneud â mynd yn ôl allan a pheidio â chuddio. Fe wnes i guddio i ffwrdd o'r byd, mae'n dal yn anodd ei wneud ond roedd eich swyddogion mor garedig roeddwn i'n teimlo'n ddiogel ac mae hynny'n rhywbeth nad ydw i wedi'i deimlo ers amser maith. Roedd y ddau swyddog y bues i'n siarad gyda yn gwneud i mi deimlo fy mod yn cael fy nghlywed.

"Pan ddaeth y Daith Gerdded a Siarad i fyny roeddwn i'n meddwl efallai y byddai hyn yn fy helpu gan nad oeddwn i wedi bod yn ôl i'r dref ers 2014. Byddwn yn gwneud pob esgus o dan yr haul i beidio â mynd i'r dref - roedd popeth yn codi ofn arna' i; y sŵn, y torfeydd.

"Dw' i wir yn teimlo fy mod i wedi cael budd mawr o'r daith gerdded. Mae'n wir bod gen i ffordd bell i fynd ond dw' i'n iawn am hynny yn awr. Dwi'n meddwl yr oeddwn i'n credu y byddech chi'n fy ngadael yno ond safodd un swyddog gyda mi cyn y daith gerdded a siarad ac ni gadawodd fy ochr. Roeddwn i mor ofnus, mae wir yn anodd esbonio, yna cymerodd y swyddog arall yr awenau ar y daith gerdded a siarad, roedden nhw'n anhygoel."

Dywedodd PC Chesters: "Gall fod yn gyfle i ddioddefwr trosedd adennill rhywfaint o reolaeth dros yr hyn a ddigwyddodd a hyd yn oed roi rhywfaint o derfyn iddynt – os ydyn nhw'n dymuno, gallwn fynd gyda nhw i ble ddigwyddodd y digwyddiad a'i drafod gyda nhw, os nad ydyn nhw am wneud hynny – mae hynny'n iawn. Mae'r Daith Gerdded a Siarad yn ymwneud â'r hyn y maen nhw am ei gael allan o'r sesiwn.

I archebu Taith Gerdded a Siarad un i un yng ngorsaf Picaddilly Manceinion, e-bostiwch [email protected]