Swyddogion a staff BTP yn cael eu hanrhydeddu am eu gwasanaeth gan Ei Mawrhydi Y Frenhines

Mae tri o swyddogion a staff Heddlu Trafnidiaeth Prydeinig (BTP) i gael eu cydnabod gan Ei Mawrhydi y Frenhines fel rhan o'i Hanrhydeddau Pen-blwydd.

Y tri chydweithiwr sydd wedi cael eu hanrhydeddu am wasanaethau i blismona yw:
• Dyfernir QPM i'r Ditectif Brif Arolygydd Kate Forsyth, sydd wedi'i lleoli yn Llundain.
• Dyfernir MBE i Reolwr Adnoddau'r Llu, Elizabeth McWhirter, sydd wedi'i lleoli ym Mirmingham.
• Dyfernir OBE i Dditectif Uwcharolygydd Gary Richardson, sydd wedi'i leoli yn Llundain.

Cydnabuwyd Kate Forsyth o Gaint, yr oedd ei diwrnod olaf o wasanaeth gyda BTP ar ôl 30 mlynedd yn cyd-fynd â'r cyhoeddiad Anrhydeddau Pen-blwydd, am ei sgiliau arwain rhyfeddol. Cafodd ei chanmol yn benodol am ei harweiniad personol yn dilyn yr ymosodiad terfysgol ym Mhont Llundain lle dangosodd ymroddiad a phroffesiynoldeb ar y noson ac yn y dyddiau a ddilynodd. Cafodd ei chanmol hefyd am ei chefnogaeth ddiwyro i ddioddefwyr troseddau a adlewyrchwyd gan ei phenderfyniad i sicrhau cyfiawnder i ddioddefwyr.

Mae Elizabeth McWhirter, sy'n wreiddiol yn dod o Darwen ac sydd wedi ymgartrefu yn Swydd Stafford, wedi gwasanaethu yn BTP am 15 mlynedd ac wedi cael ei chydnabod am ei gwasanaethau i blismona a diogelwch y cyhoedd. Chwaraeodd rôl sylweddol wrth gynllunio ymateb BTP trwy gydol y pandemig Covid-19 i ddiogelu gwasanaethau rheilffyrdd critigol. Mae hi'n uchel ei pharch o fewn y Llu ac yn cael ei chydnabod fel unigolyn sydd wedi ymrwymo'n llwyr i gefnogi ei chydweithwyr rheng flaen i ddarparu gwasanaeth heddlu sy'n hynod weladwy a phroffesiynol i'r cyhoedd sy'n teithio a staff y rheilffyrdd.

Cydnabuwyd Gary Richardson, a ymunodd â BTP yn 2011 ar ôl 30 mlynedd o wasanaeth gyda’r Gwasanaeth Heddlu Metropolitanaidd (MPS), am ei rôl yn arwain ymchwiliadau i dros 100 o lofruddiaethau yn ystod ei amser gyda BTP a’r MPS. Sicrhaodd ei brofiad, ei benderfyniad, ei farn dda a'i dosturi fod ymchwiliadau'n mynd rhagddynt yn gyflym â chyfraddau canfod uchel. Fe’i disgrifiwyd fel heddwas eithriadol, sy’n darparu presenoldeb calonogol sylweddol i ddioddefwyr.

Dywedodd y Prif Gwnstabl Paul Crowther CBE: “Rwyf yn falch iawn o weld gwaith caled swyddogion a staff BTP yn cael ei gydnabod gan Ei Mawrhydi fel rhan o’i Anrhydeddau Pen-blwydd. Mae pob cydweithiwr wedi arddangos y gorau oll o ran plismona Prydain, gan wasanaethu'r cyhoedd i'r safon uchaf un ac mae'r gydnabyddiaeth hon yn haeddiannol iawn.

“Mae Kate, Liz a Gary wedi arddangos arweinyddiaeth, anhunanoldeb ac ymrwymiad diwyro i sicrhau bod y miliynau o bobl sy’n teithio ar reilffyrdd Prydain yn gallu gwneud hynny’n ddiogel. Dylai pob un ohonyn nhw fod yn hynod falch o’u cyflawniad ac rwyf wrth fy modd eu bod wedi cael eu cydnabod yn Anrhydeddau Pen-blwydd y Frenhines. ”

Dywedodd y Ditectif Brif Arolygydd Kate Forsyth: “Pan gefais wybod am yr enwebiad am y tro cyntaf cefais sioc llwyr, a chymerodd amser i faint yr anrhydedd suddo i mewn. Rwyf yn teimlo'n hynod o freintiedig i gael fy nghydnabod fel hyn. Mae'n coroni gwasanaeth o 30 mlynedd boddhaus, gwerth chweil a difyr gyda'r heddlu. Mae hefyd yn adlewyrchiad o'r rhai hynny rwyf wedi gweithio gyda nhw dros y blynyddoedd.”

Dywedodd Rheolwr Adnoddau’r Llu, Elizabeth McWhirte:“Mae’n anrhydedd ac yn fraint llwyr i mi dderbyn y wobr hon ac er ei bod yn wobr unigol rwyf bob amser yn hynod ddiolchgar am yr arweinyddiaeth, y gefnogaeth a’r cyfeillgarwch a dderbyniaf gan fy holl gydweithwyrr proffesiynol a hynod gweithgar o fewn BTP.
“Diolch arbennig iawn i bwy bynnag wnaeth fy enwebu ar gyfer y wobr hon ac rwyf yn edrych ymlaen yn fawr at rannu'r gyfrinach hon gyda fy nheulu a ffrindiau o'r diwedd.”

Dywedodd y Ditectif Uwcharolygydd Gary Richardson:“Mae’n anrhydedd wirioneddol i mi dderbyn gwobr mor glodfawr, ond nid yw’n gymaint o adlewyrchiad ohonof i ag y mae o waith caled ac ymdrechion cyfunol pawb yn y tîm Troseddau Cyfundrefnol Difrifol Mawr. Mae'n fraint cael gweithio ochr yn ochr â nhw, ac rwyf yn hynod falch o'r cyfan rydym wedi'i gyflawni gyda'n gilydd."