BTP yn dathlu pum mlynedd o Brosiect Servator ledled Cymru, Lloegr a'r Alban

Y mis hwn mae Heddlu Trafnidiaeth Prydeinig (BTP) yn dathlu pumed pen-blwydd lleoli Prosiect Servator ar draws y rhwydwaith reilffyrdd.

Mae'r rhain yn batrolau anrhagweladwy, amlwg iawn ac wedi'u harwain gan gudd-wybodaeth sy'n tarfu ar ystod eang o weithgareddau troseddol, gan gynnwys terfysgaeth, ac ar yr un pryd yn darparu presenoldeb calonogol i deithwyr.

Mae swyddogion Prosiect Servator wedi'u hyfforddi'n arbennig i adnabod unigolion a allai fod yn cynllunio neu'n paratoi i gyflawni trosedd. Gall hyn amrywio o rywun yn dwyn o siopau mewn gorsaf i unigolyn sy'n cynnal rhagchwilio gelyniaethus wrth baratoi ar gyfer ymosodiad terfysgol - mae'r arwyddion arferol sy'n dod â nhw i sylw swyddogion yr un peth.

Fe'u cefnogir gan ystod o adnoddau arbenigol, megis heddlu arfog a chŵn chwilio, heb sôn am dros 150,000 o gamerâu teledu cylch cyfyng ar draws y rhwydwaith rheilffyrdd.

Mae Prosiect Servator yn cynnwys gweithio gyda heddluoedd eraill, busnesau, cwmnïau gweithredu trenau a'r cyhoedd i adeiladu rhwydwaith o wyliadwriaeth, ac yn sicrhau bod rhwydwaith rheilffyrdd y DU yn lle anodd i droseddwyr a therfysgwyr weithredu.

Ers 2015 bu bron i 650 o arestiadau o ganlyniad i leoliadau Prosiect Servatoe ledled Cymru, Lloegr a'r Alban, sydd wedi gweld popeth o gyllyll a chyffuriau i nwyddau wedi'u dwyn a throseddwyr mae'r heddlu'n chwilio amdanynt yn cael eu tynnu oddi ar y strydoedd.

Dyma rai enghreifftiau diweddar o'r rhain:

:

• Gwelwyd dyn yn ymddwyn yn amheus yng ngorsaf danddaearol Wood Lane gan swyddogion Prosiect Servator ym mis Awst. Yn dilyn chwiliad, canfuwyd ei fod yn cario nifer o gyffuriau dosbarth B a chyllell glo. Cafodd ei arestio a'i gyhuddo'n ddiweddarach o fod â chyffur dosbarth B yn ei feddiant a bod â theclyn wedi'i lafnu yn ei feddiant.  

• Ym mis Medi daliodd dyn sylw swyddogion Prosiect Servator mewn dillad plaen yn Basingstoke cyn mynd ymlaen i gyfnewid eitem â dyn arall. Cafodd y dyn ei stopio a'i chwilio gan swyddogion mewn iwnifform a chanfuwyd bod ganddo lawer iawn o Gyffuriau Dosbarth A a B. Yna cafodd ei gyhuddo a'i remandio â Meddiant  Bwriad i Gyflenwi.
• Pan oeddent ar batrôl Prosiect Servator yng ngorsaf Caerfaddon ym mis Medi, roedd swyddogion a hyfforddwyd yn arbennig yn adnabod dyn yr oeddent yn gwybod bod yr heddlu'n chwilio amdano oherwydd iddo fethu ag ymddangos.  Cafodd ei arestio ac aethpwyd ag ef i'r ddalfa.
• Daliodd dyn 22 oed sylw swyddogion ar batrôl Prosiect Servator ym Manceinion ym mis Tachwedd, ar ôl iddo gael ei weld yn ymddwyn yn amheus. Cafodd ei chwilio a daethpwyd o hyd i lechen wedi'i dwyn o siop tecawê gerllaw wedi'i guddio i lawr ei drowsus. Cafodd ei arestio ar amheuaeth o drin nwyddau wedi'u dwyn a chafodd ei riportio'n ddiweddarach am y drosedd.

Dywedodd yr Uwch-arolygydd Sandra England:“Rydym wrth ein bodd ein bod yn dathlu pum mlynedd o Brosiect Servator yn Heddlu Trafnidiaeth Prydeinig y mis hwn.

“Mae lleoliadau Prosiect Servator yn hanfodol wrth greu rhwydwaith o wyliadwriaeth ac amgylchedd anodd i derfysgwyr sy'n ystyried eu targedau ac unigolion sy'n ceisio cyflawni troseddau.

 “Mae gan bawb sy’n defnyddio'r rheilffyrdd ac yn gweithio ar draws ein rhwydwaith reilffyrdd rôl hanfodol i’w chwarae o ran bod yn llygaid a chlustiau i ni, a hoffwn ddiolch i’r cyhoedd am eu cefnogaeth barhaus i riportio pethau nad ydynt yn teimlo’n iawn iddyn nhw.

“Os ydych chi'n ein gweld ni o gwmpas y lle, dewch i ddweud helo a dysgu rhagor am y gwaith rydym yn ei wneud i'ch cadw chi'n ddiogel.”

Gallwch riportio unrhyw beth amheus trwy siarad â heddwas neu aelod o staff y rheilffyrdd, neu drwy anfon neges destun atom yn gynnil ar 61016. Mewn argyfwng, ffoniwch 999