B Cyhoeddwyd Alistair Sutherland fel Dirprwy Brif Gwnstabl newydd Heddlu Trafnidiaeth Prydeinig

Heddiw, cyhoeddodd Awdurdod Heddlu Trafnidiaeth Prydeinig (BTPA) fod Alistair Sutherland QPM wedi'i benodi'n Ddirprwy Brif Gwnstabl Heddlu Trafnidiaeth Prydeinig (BTP).  Bydd yn ymuno â BTP yn Hydref 2021.

Ar hyn o bryd Alistair yw'r Comisiynydd Cynorthwyol ar gyfer Heddlu Dinas Llundain. Bydd Dirprwy Brif Gwnstabl presennol BTP, Adrian Hanstock QPM, yn ymddeol ym mis Hydref 2021 ar ôl 37 mlynedd o wasanaeth rhagorol i blismona'r DU, ac mae'r saith blynedd olaf wedi bod gyda'r Llu.

Ymunodd Alistair â'r Gwasanaeth Heddlu Metropolitanaidd ym 1986. Mae wedi gweithio ar draws nifer o fwrdeistrefi yn Llundain gan gynnwys Lambeth, Hounslow a Kensington ac mae ganddo arbenigedd mewn plismona digwyddiadau trefn gyhoeddus mawr a gweithrediadau arfau tanio'r heddlu, diogelwch ac ymateb. Cafodd ei ddyrchafu'n Gomander ym mis Gorffennaf 2014 ar ôl cwblhau'r Cwrs Gorchymyn Strategol yn llwyddiannus, ac ymgymerodd â rôl Comander ar gyfer Diogelu'r Frenhiniaeth, Diplomataidd ac Arbenigol. Yn ystod y cyfnod hwn, arweiniodd ef ar gyfuno'r gorchmynion Diogelu gan arwain ar gyflwyno Gorchmynion y Frenhiniaeth a Diogelu Arbenigol a Gorchmynion Diogelu Seneddol a Diplomataidd.

Ymunodd Alistair â Heddlu Dinas Llundain yn 2016 ac ar hyn o bryd mae ganddo'r portffolios plismona Cenedlaethol ar gyfer Troseddau Busnes, Cynllun Achredu Diogelwch Cymunedol, Diwydiant Diogelwch Preifat a Phrosiect Servator. Ef yw'r arweinydd cenedlaethol ar gyfer Gorchymyn a Rheoli Gwrthderfysgaeth ac mae hefyd yn Gyfarwyddwr Cwrs ar gyfer Cwrs y Comander Gwrthderfysgaeth.

MaeAlistair yn dweud: "Rwy'n teimlo'n hynod falch o fod yn ymuno â BTP fel Dirprwy Brif Gwnstabl ar adeg gyffrous iawn i'r Llu. Edrychaf ymlaen yn fawr at weithio gyda'r Prif Gwnstabl a'r holl gydweithwyr BTP yn genedlaethol i ddarparu'r gwasanaeth gorau posibl i'n holl gymunedau ar draws y rhwydwaith rheilffyrdd a'u cadw'n ddiogel. Mae BTP, a hynny'n gwbl briodol, yn uchel ei barch fel Llu ac yn cael eu cydnabod fel arweinwyr cenedlaethol a byd-eang yn eu maes Plismona. Rwyf wedi ymrwymo i wella'r enw da hwnnw drwy weithio'n agos gyda chydweithwyr a'n partneriaid i gyflawni'r holl uchelgeisiau a ddisgrifir yn ein Cynllun Plismona."

Meddai Cadeirydd BTPA, Ron Barclay-Smith,: "Bydd arbenigedd sylweddol a phrofiad eang Alistair ar draws pob lefel o blismona yn ei wasanaethu'n dda ar adeg pan fo BTP yn wynebu sawl her o ran amgylchedd gweithredu cymhleth. Rydym yn ei groesawu ac yn credu y bydd ei arweinyddiaeth, ei fewnwelediad a'i graffter yn ategu arweinyddiaeth y Prif Gwnstabl, gan ysgogi BTP ymlaen i gyflawni lefel uwch fyth o ragoriaeth."

Meddai Prif Gwnstabl BTP, Lucy D'Orsi: "Rwyf wrth fy modd bod Awdurdod yr Heddlu wedi penodi Alistair i fod yn Ddirprwy Brif Gwnstabl BTP. Mae Alistair yn uwch arweinydd heddlu hynod brofiadol sy'n poeni'n angerddol am ddarparu gwasanaeth o ansawdd uchel i'r cyhoedd a chefnogi ei gydweithwyr. Yr wyf yn sicr y bydd ei ymroddiad a'i brofiad helaeth o arwain gweithredol a sefydliadol yn dod â gwerth mawr i'r Llu.

Rwy'n gwybod bod Alistair yn awyddus i adeiladu ar yr etifeddiaeth y mae Adrian Hanstock yn ei gadael. Mae arnom ddiolchgarwch mawr i Adrian am ei arweinyddiaeth a'i ymrwymiad eithriadol i wasanaeth cyhoeddus ac yr wyf yn bersonol ddiolchgar am ei gefnogaeth a'i ddoethineb ers imi fod yn Brif Gwnstabl.

Mae BTP yn heddlu cenedlaethol gwirioneddol ragorol gyda llawer o heriau a chyfleoedd cyffrous o'n blaenau. Rwy'n edrych ymlaen at weithio gydag Alistair."

CafoddAlistair ei ddewis yn dilyn proses cyfweld ac asesu dan arweiniad BTPA, y corff goruchwylio ar gyfer y BTP. Cymeradwywyd y penodiad gan yr Ysgrifennydd Gwladol dros Drafnidiaeth Grant Shapps AS ac fe'i cymeradwywyd gan Weinidog Cyfiawnder yr Alban, Keith Brown MSP.