Arestiadau wedi'u gwneud wrth i gannoedd o swyddogion weithio i fynd i'r afael ag ymddygiad rhywiol digroeso

Ymunodd cannoedd o swyddogion Heddlu Trafnidiaeth Prydeinig â diwrnod o weithredu'n targedu ymddygiad rhywiol digroeso ar y rhwydwaith rheilffyrdd, ledled Cymru, Lloegr a'r Alban.

Cynhaliwyd dros dri chant o batrolau wedi'u targedu gan swyddogion dillad plaen a swyddogion mewn iwnifform mewn gorsafoedd ac ar drenau, gan arwain at saith arestiad a sgyrsiau di-ri gyda theithwyr.

Fe'u cefnogwyd gan swyddogion cudd sydd wedi'u hyfforddi'n arbennig i adnabod troseddwyr rhywiol, a chasglu cudd-wybodaeth, sy'n gweithredu ar draws y rhwydwaith yn ddyddiol.

Fe wnaeth swyddogion ymgysylltu â miloedd o deithwyr mewn stondinau ymgysylltu mewn hybiau trafnidiaeth allweddol, gan ddarparu gwybodaeth ar sut i riportio ymddygiad rhywiol digroeso trwy ddefnyddio ein rhif testun cynnil.

Cefnogwyd y diwrnod gweithredu ar 30 Medi gan ddeg ar hugain o bartneriaid, gan gynnwys Transport for London, Network Rail, gweithredwyr trenaua heddluoedd lleol.

Mae mynd i’r afael â throseddu rhywiol yn brif flaenoriaeth i Heddlu Trafnidiaeth Prydeinig, ac eleni rydym bron wedi treblu nifer y swyddogion sydd wedi’u hyfforddi’n arbennig i ymchwilio i droseddau rhywiol ledled Cymru, Lloegr a’r Alban.

Mae'r swyddogion hyn yn derbyn hyfforddiant arbenigol trylwyr ym meysydd cefnogi dioddefwyr ac ymchwilio i droseddau rhywiol, gan gynnwys cam-drin plant yn rhywiol a throseddu rhywiol ar-lein.

Dywedodd y Ditectif Brif Arolygydd Sarah White: “Yn ogystal â phatrolau wedi’u targedu, cawsom gyfle i gael miloedd o sgyrsiau gyda theithwyr ar ddydd Mercher, gan eu hannog i fod â’r hyder i riportio ymddygiad rhywiol digroeso i ni.

“Mae ymddygiad rhywiol digroeso yn unrhyw beth sy’n gwneud i berson deimlo’n anghyfforddus, ac ni allaf bwysleisio digon nad oes unrhyw ddigwyddiad yn rhy fach nac yn ddibwys. Byddwn bob amser yn eich cymryd o ddifrif.

"Mae pob adroddiad a dderbyniwn yn darparu gwybodaeth werthfawr i ni y gallwn ei defnyddio i adeiladu darlun o droseddwr. Yn aml mae'n caniatáu i ni sylwi ar batrwm o ymddygiad troseddol ac yna gweithredu.

"Rydym am i bawb wybod eu bod nhw'n gallu anfon neges destun atom yn gynnil ar 61016, p'un a yw rhywbeth yn digwydd i chi ar y pryd neu wedi digwydd i chi'n ddiweddar. Gall ein hystafell reoli anfon swyddogion i leoliad os oes angen, neu eich rhoi mewn cysylltiad â swyddog i siarad ar amser cyfleus. Cadwch 61016 yn eich ffôn, fel bod gennych y rhif wrth law pe byddech chi byth ein hangen ni."

Dywedodd Jacqueline Starr, Prif Swyddog Gweithredol y Grŵp Cyflenwi Rheilffyrdd sy’n cynrychioli gweithredwyr trenau a Network Rail: “Mae’r risg o brofi trosedd ar y rheilffordd yn isel iawn ond mae atal ymddygiad rhywiol digroeso yn rhywbeth y mae cwmnïau rheilffyrdd yn ei gymryd o ddifrif.

“Rydym yn gwybod pan yw'r troseddau hyn yn digwydd, mae llawer yn mynd heb eu riportio a dyna pam mae gweithredwyr trenau'n paratoi ymgyrchoedd newydd i annog riportio a fydd yn helpu'r BTP i ddal y rhai sy'n gyfrifol.”