Arestiadau ar ôl i drolïau siopa gael eu taflu ar y rheilffordd - Swydd Hertford

Mae dau arestiad wedi’u gwneud yn ystod ymgyrch gan Heddlu Trafnidiaeth Prydeinig (BTP) a Network Rail ar ôl i gyfres o eitemau gael eu taflu ar y rheilffordd yn Hadley Wood, Swydd Hertford.

Ar 10 achlysur rhwng Tachwedd 2022 a Mawrth 2023, cafodd eitemau gan gynnwys trolïau siopa, pram, a cheffyl dillad eu taflu neu eu gosod ar y cledrau yn Hadley Wood, gyda threnau’n taro’r gwrthrychau mewn pedwar achos.

Fe wnaeth swyddogion BTP, gyda chefnogaeth staff Network Rail, gynnal ymgyrch ar sail cudd-wybodaeth ar y rheilffordd ger gorsaf Hadley Wood am 11pm ar 4 Ebrill.

Fe gafodd dyn 24 oed ei arestio yn y lleoliad yn ystod yr ymgyrch, a chafodd ail ddyn, 26 oed, ei arestio mewn cyfeiriad yn Barnet ar 5 Ebrill – y ddau ar amheuaeth o beryglu diogelwch ar y rheilffordd.

Ers hynny maen nhw wedi cael eu rhyddhau o ddalfa’r heddlu ar fechnïaeth amodol tra’n aros am ymholiadau pellach.

Dywedodd Rhingyll BTP, Rehan Ahmad: “Mae rhwystro’r rheilffordd nid yn unig yn achosi oedi difrifol i wasanaethau, ond hefyd yn peryglu bywydau teithwyr a staff y rheilffordd.

"Mae gan bawb yr hawl i deithio'n ddiogel, heb aflonyddwch, ac mae ymddygiad di-hid fel taflu gwrthrychau ar y lein yn bygwth yr hawl hon.

“Os ydych chi'n gweld digwyddiad o’r natur hwn, rhowch wybod i ni naill ai drwy decstio 61016 neu ffonio 0800 40 50 40 – rydym yn cymryd yr adroddiadau hyn o ddifrif a byddwn ni bob amser yn gweithredu.”

Dywedodd Sam MacDougall, Cyfarwyddwr Gweithrediadau llwybr Arfordir y Dwyrain Network Rail: “Mae’n dyst i waith caled Heddlu Trafnidiaeth Prydeinig a Network Rail bod yr arestiadau hyn wedi’u gwneud.

“Mae’r math hwn o ymddygiad difeddwl yn anhygoel o beryglus, ac yn achosi oedi diangen y gellir ei osgoi yn gyfan gwbl i deithwyr. Byddem yn annog unrhyw un sy’n gweld unrhyw fath o ymddygiad amheus ar y rheilffordd i roi gwybod i Heddlu Trafnidiaeth Prydeinig.”