Yr heddlu'n cynnal ymgyrch i fynd i'r afael ag ASBl a chludo cyllyll yn Bournemouth

Cynhaliodd Heddlu Trafnidiaeth Prydeinig a Heddlu Dorset ymgyrch i fynd i’r afael â’r rhai sy'n cario cyllyll ac yn ymddwyn yn wrthgymdeithasol yng Ngerddi Bournemouth, Pier Approach a’r dref ehangach.

Gwelodd Ymgyrch Fireglow, a gynhelir bob penwythnos, adnoddau ychwanegol ar ddydd Gwener 21 Gorffennaf 2023 gyda HTP yn gweithredu bwa cyllyll yn yr orsaf reilffordd gyda swyddogion mewn iwnifform a dillad plaen.

Yn ystod yr ymgyrch gyda’r nos ac i mewn i’r nos, gwnaeth swyddogion Heddlu Dorset bedwar arestiad, cyhoeddwyd un datrysiad cymunedol, cynhaliwyd chwe chwiliad stopio a chyhoeddwyd dau hysbysiad gwasgaru yn cyfarwyddo unigolion i adael y dref, yn ogystal â chwilio am berson coll ac ymateb i sawl adroddiad o bartïon ar draeth Bournemouth. Cynhaliodd swyddogion o HTP chwe chwiliad arall gan arwain at ymdrin â thri o bobl am feddiant ar gyffuriau.

Dywedodd y Rhingyll Ryan Wood o Heddlu Trafnidiaeth Prydeinig:

“Mewn ymgyrch ar y cyd â Heddlu Dorset, fe wnaethom safiad yn erbyn troseddau cyllyll yng ngorsaf reilffordd Bournemouth, gan anfon neges glir na fydd y gymuned hon yn goddef trais o’r fath. Ein cenhadaeth oedd diogelu lles pob unigolyn sy’n defnyddio ein system cludiant cyhoeddus.

“Fel swyddog heddlu, rwy’n credu’n gryf bod rhaid i ni barhau â’n hymdrechion diflino i frwydro yn erbyn troseddau sy’n ymwneud â chyllyll. Nid gwneud arestiadau yn unig yw hyn; mae'n ymwneud â chael effaith gadarnhaol ar fywydau pobl ifanc a allai fel arall gael eu dylanwadu gan lwybr peryglus. Mae angen i ni feithrin amgylchedd lle mae addysg, cymorth, a chyfleoedd ar gael yn rhwydd i’w llywio i ffwrdd o drais.

“Gall ein penderfyniad ar y cyd i greu strydoedd a mannau cyhoeddus mwy diogel wneud gwahaniaeth gwirioneddol. Ynghyd â’n cymuned, gallwn dorri’r cylch o droseddau cyllyll ac adeiladu dyfodol mwy disglair, mwy diogel i bawb. Boed i’r ymgyrch hon ein hatgoffa, pan fyddwn yn sefyll yn unedig yn erbyn trais, y gallwn gyflawni canlyniadau rhyfeddol.”

Dywedodd yr Arolygydd Ady Thompson, o Dîm Plismona yn y Gymdogaeth Bournemouth:

“Mae Ymgyrch Fireglow wedi’i chynllunio i ymgysylltu â phobl, dangos ein bod yn hygyrch a cheisio atal troseddau a amheuir rhag digwydd trwy batrolau troed amlwg iawn mewn mannau problemus i ddelio â mân faterion cyn iddynt waethygu i fod yn ddigwyddiadau mwy arwyddocaol. Cynhelir yr ymgyrch bob penwythnos i sicrhau ein bod yn gwneud Dorset mor ddiogel â phosibl i drigolion ac ymwelwyr.

“Yn ystod y noson, fe fu swyddogion o Heddlu Dorset hefyd yn chwilio lleoliadau allweddol gyda datgelwyr metel lle mae cyllyll ac arfau eraill wedi'u cuddio mewn llwyni ac isdyfiant yn y dref yn flaenorol. Ar yr achlysur hwn ni ddaethpwyd o hyd i unrhyw beth ar ôl i'r dail gael ei dorri'n ôl gan Gyngor BCP i'w gwneud yn anoddach i eitemau gael eu cuddio.

“Mae’r canlyniadau’n dangos ein bod ni’n benderfynol o wneud popeth o fewn ein gallu i atal adroddiadau o ymddygiad gwrthgymdeithasol a throseddau, yn arbenndig y rhai sy’n ymwneud â chyllyll ac mae ymgyrchodd ar y cyd o’r natur hwn yn anelu at anfon neges nad oes croeso i gyllyll yn Dorset a byddwn yn mynd i’r afael â’r rhai sydd am ymddwyn yn anghymdeithasol i sicrhau bod y dref yn lle croesawgar i bawb.

Yn ystod yr ymgyrch, bu swyddogion hefyd yn ymgysylltu â safleoedd trwyddedig ynghylch defnyddio bwâu cyllyll a ‘gwirio â dyfais’ cwsmeriaid i sicrhau nad oedd unrhyw arfau’n cael eu dwyn i mewn i leoliadau.

Dywedodd y Prif Uwch-arolygydd Heather Dixey o Heddlu Dorset:

“Rydym yn cydnabod bod troseddau treisgar a throseddau cyllyll yn bryder i’n cymunedau ac yn deall y gallai nifer o ddigwyddiadau diweddar fod wedi achosi mwy o bryder i aelodau’r cyhoedd. Hoffwn i roi sicrwydd i’n preswylwyr a’n hymwelwyr nad yw’r rhain yn gysylltiedig ac yn nodweddiadol yn cynnwys pobl sy’n hysbys i’w gilydd.

“Rydym yn awyddus i roi sicrwydd i gymunedau ein bod yn mynd i’r afael â’r digwyddiadau, gyda swyddogion yn patrolio lleoliadau allweddol yn rhagweithiol gan ddefnyddio tactegau plismona priodol ac yn gweithio gyda phartneriaid i sicrhau bod pobl yn ddiogel ac yn gallu teimlo’n ddiogel yng nghanol y dref.

“Yn ddiweddar rydym wedi cyflwyno model newydd wedi’i ddiweddaru o ran sut rydym yn defnyddio swyddogion dros nos yn ystod y penwythnosau pan rydym wedi gweld rhai o’r troseddau hyn yn digwydd yn ein mannau problemus. Ers cyflwyno’r model rhagweithiol hwn, rydym wedi gweld gostyngiad yn nifer y troseddau treisgar difrifol sy'n cael eu riportio.

“Yn ogystal, rydym wedi cynyddu nifer y swyddogion yn ein tîm cymdogaeth canol tref, sydd wedi galluogi gostyngiad cyffredinol mewn ymddygiad gwrthgymdeithasol o 25 y cant ar draws y dref.”

Dywedodd Comisiynydd Heddlu a Throseddu Dorset, David Sidwick:

“Rwy’n falch o weld Heddlu Dorset o gwmpas y lle ar nos Wener brysur yn Bournemouth yn targedu’r rhai sy’n ymwneud ag ymddygiad gwrthgymdeithasol a’r rhai sy’n cario cyllyll.

“Rwyf wedi fy nghalonogi’n fawr o weld bod yr ymgyrch hon yn cynnwys gweithio gyda Heddlu Trafnidiaeth Prydeinig a gosod ‘bwa cyllell’ yng Ngorsaf Drenau Bournemouth. Rwyf yn gwybod bod troseddau cyllyll yn bryder difrifol i drigolion a chymunedau Dorset a hefyd i’r rhai sy’n ymweld â’n sir, felly bydd yr ymgyrch hon yn anfon neges glir i ddweud bod Heddlu Dorset yn gwrando, eu bod yn deall y pryderon ac yn cymryd camau rhagweithiol i fynd i’r afael â hwy.

“Mae lleihau trais ac ymddygiad gwrthgymdeithasol ill dau yn feysydd gwaith penodol a amlygwyd yn fy Nghynllun Heddlu a Throseddu ac felly bydd y ddau yn parhau i fod yn brif flaenoriaeth i Heddlu Dorset. Bydd yr ymgyrch hon, yn ogystal â'r holl rai eraill sy'n digwydd ar draws y sir, a'r holl waith sy'n digwydd bob dydd o'r wythnos i fynd i'r afael â thrais difrifol ac ymddygiad gwrthgymdeithasol yn parhau, yn rhagweithiol ac yn gyflym.

“I bawb sy’n dewis cario cyllell, fy neges yw hyn – rydych deirgwaith yn fwy tebygol o gael eich anafu oherwydd eich bod yn cario cyllell. Rydych yn dewis cyflawni trosedd ddifrifol dim ond trwy gael y gyllell yn eich meddiant ac oherwydd hynny, rydych yn cymryd y risg o nid yn unig mynd i'r carchar, ond cael eich hun yn brifo ac anafu neu ladd person arall yn ddifrifol - eich dewis ar hyn o bryd; gallai rhoi’r gyllell honno yn eich poced neu’ch bag ddifetha eich bywyd, bywyd eich teulu, bywyd rhywun arall a bywydau ei deulu ef a’i ffrindiau – chi biau’r dewis.”