Cynllun newydd wedi'i gyhoeddi i fynd i'r afael ag ymddygiad gwrthgymdeithasol yng ngorsafoedd rheilffordd Gogledd Cymru

Mae'r rhai sy'n ymwneud yn gyson ag ymddygiad gwrthgymdeithasol ar fin cael eu gwahardd o nifer o orsafoedd rheilffordd ar draws Gogledd Cymru.

Bydd y cynllun Tynnu Caniatâd Goblygedig Yn ôl (TCG), wedi'i gyflwyno gan Trafnidiaeth Cymru a’i gefnogi gan Heddlu Trafnidiaeth Prydeinig, yn targedu troseddwyr cyson mewn gorsafoedd yng Nghaergybi, Bangor, Bae Colwyn a Phrestatyn.

Gellir defnyddio’r cynllun hefyd ar gyfer y rhai sy’n loetran yn barhaus mewn ac o amgylch gorsafoedd neu’n achosi problemau drwy gardota’n barhaus ac yn ymosodol.

Cafodd y cynllun ei gyflwyno ar ddechrau mis Medi a bydd yn parhau am gyfnod amhenodol, gyda gorsafoedd eraill yn cael eu hychwanegu os oes angen.

Bydd y rhai sy'n ymddwyn yn wrthgymdeithasol yn barhaus yn yr ardaloedd hyn yn cael hysbysiad a fydd yn eu gwahardd rhag loetran o gwmpas yr orsaf.  Bydd y rhai sy'n torri'r hysbysiad yn agored i gael eu harestio. 

Dywedodd PCSO Dumbell, o Heddlu Trafnidiaeth Prydeinig:  

“Dylai teithwyr, cwsmeriaid a gweithwyr mewn gorsafoedd allu mynd o gwmpas eu busnes mewn amgylchedd diogel a chroesawgar.  Rydym yn gwybod y gall ymddygiad gwrthgymdeithasol fod yn frawychus ac yn fygythiol. Mae cyflwyno’r cynllun hwn yn ffordd arall y gallwn ni fynd i’r afael â’r mater pwysig hwn.

“Dim ond ychydig o bobl barhaus sydd ei angen i greu problemau ehangach ac rydym yn benderfynol o wneud popeth o fewn ein gallu i fynd i’r afael ag ymddygiad gwrthgymdeithasol yn y gorsafoedd hyn ac o’u cwmpas i sicrhau diogelwch pawb. Gall unrhyw un sy’n gweld neu’n profi ymddygiad gwrthgymdeithasol wrth deithio ein tecstio ni yn gynnil ar 61016.”

Ychwanegodd Andrew Baker, Rheolwr Gorsafoedd Gogledd-orllewin Cymru, Trafnidiaeth Cymru:

“Bydd y cynllun Tynnu Caniatâd Goblygedig Yn ôl yn rhoi hyder i’n staff a chymudwyr na fydd ymddygiad gwrthgymdeithasol yn cael ei oddef.

“Byddwn ni'n delio â phobl sy’n achosi problemau a materion hirdymor.”