Peidiwch â chymryd yr abwyd

Mae ymgyrch "Peidiwch â chymryd yr abwyd" yn codi ymwybyddiaeth o'r tactegau mae gangiau llinellau cyffuriau yn eu defnyddio i fanteisio ar blant.

Term a ddefnyddir pan yw cyffuriau'n cael eu hanfon o ddinasoedd mawr i drefi llai yw 'llinellau cyffuriau'. Yn aml, mae plant neu bobl ifanc yn eu harddegau yn cael eu defnyddio i gludo'r cyffuriau.

Gall pobl sy'n ymwneud â llinellau cyffuriau ddefnyddio'r cyfryngau cymdeithasol i geisio recriwtio eraill i gludo cyffuriau. Gallant gynnig anrhegion neu arian yn gyfnewid am gario pecynnau ar y trên iddyn nhw.

Efallai eu bod nhw'n ymddwyn fel ffrindiau neu fel bod yr hyn maen nhw'n gofyn i chi ei wneud yn ddibwys - ond mae'n fagl.

Mae'r person sy'n cario'r cyffuriau mewn sefyllfa beryglus a bydd yn derbyn ychydig iawn o arian o'i gymharu â gweddill y gang. Maen nhw'n aml yn cael eu maglu neu'n cael eu twyllo i barhau i weithio i'r llinell. Gallai'r gang drefnu i rywun gael ei ladrata, sy'n golygu eu bod yn credu eu bod mewn dyled ac yn gorfod gweithio am ddim.

Mae Heddlu Trafnidiaeth Prydeinig yn cynnal ymgyrchoedd ar y rhwydwaith rheilffyrdd ar draws Cymru, Lloegr a'r Alban bob dydd er mwyn atal cyffuriau'r llinellau cyffuriau rhag cael eu symud rhwng lleoliadau. Rydym bob amser yn trin plant sy'n ymwneud â llinellau cyffuriau fel dioddefwyr posib ac mae gennym arbenigwyr a fydd yn rhoi mesurau diogelu ar waith i gael pobl sy'n cael eu hecsbloetio i ffwrdd o niwed.