Ffurflen Protocol Philomena ar gyfer pobl ifanc a phlant sy’n wynebu risg o fynd ar goll

Proses a ffurflen yw Protocol Philomena. Mae'n caniatáu i wybodaeth hanfodol am berson ifanc neu blentyn sy’n wynebu risg o fynd ar goll gael ei chasglu. Mae'r wybodaeth wedyn ar gael pan fo’i hangen, ar adeg bryderus a gofidus. Mae'r protocol arferion gorau wedi'i enwi ar ôl Nawddsant Babanod, Plant Bach a Phobl Ifanc.

Gall y broses ddechrau sgwrs gyda'r nod o atal episodau yn y dyfodol. Gall hefyd ddod o hyd i risgiau, ac mae’n helpu gofalwyr gyda chamau i'w cymryd. Gall ffurflen gyfoes ddarparu gwybodaeth o safon. Gall helpu'r chwilio i ddechrau heb oedi, er mwyn dod o hyd i'r person yn ddiogel.

Dylai gofalwyr, gwarcheidwaid a rhieni lenwi'r ffurflen sy'n cynnwys:

• manylion personol a disgrifiad ynghyd â phobl allweddol i gysylltu â nhw
• ffactorau risg
• cytundeb â'r person ifanc ynglŷn â'r ymddygiad sy’n cael ei ddisgwyl ganddyn nhw
• gwybodaeth am bobl a lleoedd, i helpu i ddod o hyd iddyn nhw
• camau rhesymol i'r gofalwr eu cymryd
• gwybodaeth y bydd yr heddlu’n gofyn amdani

Sut i lenwi'r ffurflen

Lawrlwythwch Ffurflen Protocol Philomena ar gyfer Person Ifanc sydd ar Goll

Llenwch y ffurflen cyn gynted â phosibl gyda chymaint o fanylion ag y gallwch. I gael rhagor o gyngor, mae canllawiau swyddogol gan Gyngor Cenedlaethol Prif Swyddogion yr Heddlu, ar gael. Ar ôl ei llenwi, mae'r ffurflen yn perthyn i'r teulu neu'r darparwr gofal neu'r awdurdod lleol. Gofalwch eich bod yn adolygu'r manylion yn aml a’u diweddaru.

Sut i storio'r ffurflen yn ddiogel

Llenwch y ffurflen fel fersiwn ddigidol lle bo modd. Yna gall gael ei diweddaru a'i rhannu gyda'r heddlu. Storiwch y ffurflen yn ddiogel ar eich system gyfrifiadur. Mae angen iddi fod yn hawdd i chi, neu unrhyw ofalwr arall, ddod o hyd iddi yn y dydd neu'r nos. Fel nad ydych chi’n dibynnu ar gyfrifiadur unigol, gwnewch gopi o'r ffurflen i’w storio ar-lein wedi'i diogelu gan gyfrinair.

Perchnogaeth y ffurflen

Ar ôl cael ei llenwi, mae'r ffurflen yn perthyn i ddarparwr gofal, rhiant neu warcheidwad y person ifanc. Ddylai'r heddlu ddim llenwi'r ffurflen, na'i chadw na'i storio ar unrhyw un o lwyfannau cofnodi’r heddlu.

Os bydd person ifanc yn mynd ar goll

Os gwelwch chi fod y person ifanc neu'r plentyn wedi mynd ar goll, cymerwch gamau rhesymol i geisio dod o hyd iddyn nhw. Bydd y ffurflen yn eich helpu gyda chamau i'w cymryd.

Os na allwch chi ddod o hyd iddyn nhw, gallwch riportio person sydd ar goll ar-lein. Defnyddiwch ffurflen Protocol Philomena i roi gwybodaeth i'r heddlu.

Os yw'n argyfwng a bod y person ifanc mewn perygl, ffoniwch 999 nawr.

Pryd dylai'r ffurflen gael ei rhoi i'r heddlu

Dim ond os yw'r plentyn neu'r person ifanc yn cael eu riportio ar goll y bydd angen i'r heddlu weld y ffurflen sydd wedi'i llenwi.

Os bydd person ifanc yn symud ardal

Trosglwyddwch y ffurflen i'r gofalwr newydd, a fydd nawr yn gyfrifol am ei chadw'n ddiogel ac yn gyfoes.

Os bydd person ifanc yn trosglwyddo i'ch gofal chi o ardal arall, gwiriwch a oes ganddyn nhw Brotocol Philomena. Erbyn hyn, chi fydd yn gyfrifol am ei chadw'n ddiogel ac yn gyfoes.