Cam-fanteisio ar blant yn y diwydiant gwestai
Mae gwestai a mathau eraill o lety weithiau’n cael eu defnyddio gan droseddwyr i gamfanteisio ar blant. Mae hyn yn cynnwys camfanteisio'n rhywiol ar blant. Mae hefyd yn digwydd mewn mannau eraill mewn lletygarwch, fel siopau tecawê, siopau a chanolfannau siopa.
Mae’r heddluoedd wrthi’n gweithio ar y cyd ag asiantaethau a phartneriaid eraill i godi ymwybyddiaeth o'r drosedd yma. Maen nhw'n gwneud hyn trwy roi hyfforddiant i staff gwestai ar sut i nabod arwyddion camfanteisio a chamdriniaeth. Yr enw ar y fenter yma yw Ymgyrch Makesafe.
Beth gallwch chi ei wneud i helpu
Mae’r arwyddion posibl o gamfanteisio ar blant mewn gwestai yn cynnwys:
- person ifanc sy'n bryderus neu'n ofnus ac sydd gyda rhywun heb fod fel petaen nhw’n eu nabod
- sawl person yn ymweld â'r un ystafell, yn aml heb fawr ddim bagiau
- gwesteion yn cyrraedd gyda llawer o alcohol pan fydd plentyn neu berson ifanc gyda nhw
- sŵn anarferol neu aflonyddwch yn dod o ystafell lle rydych chi'n meddwl bod plentyn neu berson ifanc yn aros
Gall staff gwestai holi am les plentyn neu berson ifanc sydd gyda chi. Gall y cwestiynau hyn deimlo'n bersonol neu'n anghyffyrddus, ond trwy eu hateb gallwch helpu staff y gwesty i atal camfanteisio ar blant. Cofiwch: maen nhw'n holi er mwyn sicrhau y person sydd gyda chi yn ddiogel. Dydyn nhw ddim yn eich cyhuddo o wneud dim byd o'i le.
Riportio’ch pryderon
Os byddwch chi'n sylwi ar unrhyw un neu ragor o'r arwyddion uchod, neu'n teimlo bod rhywbeth o’i le, ffoniwch 999 ar unwaith.
Os oes gennych chi nam ar y clyw neu'r lleferydd, defnyddiwch ein gwasanaeth ffôn testun ar 18000 neu anfonwch neges destun aton ni ar 999 os ydych chi wedi cofrestru ymlaen llaw gyda'r gwasanaeth SMSbrys.
Gallwch hefyd ddweud wrth un o aelodau staff y gwesty.
Does dim ots os nad ydych chi'n siŵr: y peth gorau i'w wneud yw dilyn eich greddf a riportio’r peth.
Hyfforddiant i staff gwestai
Mae staff gwestai yn chwarae rhan bwysig wrth atal camfanteisio ar blant. Trwy bartneru â'ch heddlu lleol trwy Ymgyrch Makesafe, bydd eich staff yn cael hyfforddiant pwysig. Byddan nhw’n dysgu sut i nabod arwyddion o gamfanteisio ar blant a sut i riportio pryderon i'r heddlu.
Bydd hyn yn golygu eu bod nhw’n gallu cyfrannu at amgylchedd mwy diogel i bob gwestai. Bydd hefyd yn dangos eich ymrwymiad i gyfrifoldeb cymdeithasol ac yn helpu i amddiffyn rhai o'r plant a'r bobl ifanc mwyaf agored i niwed yn ein cymunedau.
I wybod mwy, gallwch gysylltu â rhaglen Hydrant drwy’r ebost. Gallan nhw eich rhoi chi mewn cysylltiad â'ch cydlynydd Ymgyrch Makesafe lleol.
Gallwch hefyd weld rhagor o ganllawiau, posteri a chardiau busnes ar gyfer Ymgyrch Makesafe ar wefan rhaglen Hydrant.