BTP yn annog rhieni i rybuddio eu plant am beryglon tresmasu

Mae rhieni'n cael eu hannog i ddysgu eu plant am beryglon y rheilffordd, ar ôl nifer o ddigwyddiadau ar y cledrau yn yr Alban.

Cofnodwyd 1669 o ddigwyddiadau tresmasu yn yr Alban yn 2021/2022 o'i gymharu â 1633 yn y flwyddyn 2020/2021. Yn ogystal â hyn, mae Heddlu Trafnidiaeth Prydeinig (BTP) hefyd wedi delio â 703 o achosion o fandaliaeth o'i gymharu â 661 o ddigwyddiadau yn ystod yr un cyfnod. Mae fandaliaeth yn cynnwys taflu cerrig, difrod i gysgodfeydd, diffoddwyr tân yn cael eu defnyddio a graffiti.

Mae swyddogion yn parhau i batrolio'r rhwydwaith i helpu i fynd i'r afael â'r mater ac wedi bod yn ymgysylltu ag ysgolion i godi ymwybyddiaeth o beryglon y rheilffordd.

Esboniodd Michael Magee, Arolygydd Heddlu Trafnidiaeth Prydeinig:"Nid maes chwarae yw'r rheilffordd. Bob tro y bydd rhywun yn camu ar y trac maent yn rhoi eu hunain mewn perygl o gael anaf difrifol sy'n newid bywyd.

"Rydym yn tueddu i weld cynnydd yn nifer yr achosion o dresmasu sy'n gysylltiedig â phobl ifanc ac ymddygiad gwrthgymdeithasol yn ystod gwyliau'r ysgol. Diogelwch yw ein prif flaenoriaeth ac rydym yn gofyn i bob un ohonom siarad â'n hanwyliaid i atal difrod pellach neu anafiadau difrifol."

Dywedodd Allan Brooking, Rheolwr Diogelwch Cymunedol Network Rail: "Gall tresmasu ar y rheilffordd arwain at anafiadau sy'n newid bywydau neu hyd yn oed rhai angheuol.  Rydym yn gweithio'n agos gyda Heddlu Trafnidiaeth Prydeinig, a phartneriaid eraill, i godi ymwybyddiaeth o beryglon tresmasu a byddem yn annog y cyhoedd i gadw oddi ar y cledrau."

INegeseuon pwysig i rieni a gofalwyr eu rhannu gyda phlant:

• Nid yw'r rhwydwaith rheilffyrdd byth yn cael ei ddiffodd. Mae trydan yn pweru'r ceblau uwchben 24/7.
• Peidiwch byth â rhagweld pryd y disgwylir y trên nesaf. Gall amserlenni newid a maent dim ond yn dangos gwasanaethau i deithwyr – gall trenau cludo nwyddau redeg ar unrhyw adeg o'r dydd neu'r nos a gallant deithio hyd at 100mya.
• Mae Tresmasu'n anghyfreithlon, a gallai unrhyw un sy'n cael ei ddal wynebu dirwy o hyd at £1,000 a chael ei adael gyda chofnod troseddol.

Mae BTP a Network Rail yn cynnal ymgyrch ddiogelwch drawiadol – You Vs Train, sy'n amlygu'r canlyniadau dinistriol a achosir gan dresmasu ar y rheilffordd. Mae rhagor o wybodaeth am ddiogelwch ar y rheilffyrdd ar gael ynwww.youvstrain.co.uk