Cyffuriau wedi'u rhyung-gipio a char wedi'i atafaelu wrth i BTP gau'n dynn ar weithgarwch Llinellau Cyffuriau yn y De-orllewin

Cafodd dyn 20 oed ei arestio ar amheuaeth o fod â meddiant gyda'r bwriad o gyflenwi cyffuriau Dosbarth A yng ngorsaf Bournemouth wrth i BTP ymuno â'i gydweithwyr yn yr heddlu i darfu ar fodel busnes Llinellau Cyffuriau yn ne-orllewin Lloegr.

Roedd yn un o bum arestiad a wnaed rhwng 23 Awst a 27 Awst wrth i Dasglu Llinellau Cyffuriau penodedig BTP gael ei hadleoli yn y rhanbarth ar draws pum diwrnod o ymgyrchoedd datblygedig.

Eu nod oedd  rhyng-gipio cyffuriau niweidiol sy'n cyrraedd drwy'r rhwydwaith rheilffyrdd cyn iddynt gyrraedd cymunedau lleol.

Yn y cyfnod o bum niwrnod, cymerodd swyddogion ran mewn pedair ymgyrch, gan atafaelu un cerbyd, naw ffôn, cyffuriau Dosbarth A a B, a £6,000 mewn arian parod.

Roedd yr ymgyrchoedd yn gweld cŵn a swyddogion cyffuriau o Dasglu BTP, mewn iwnifform a dillad plaen, yn cael eu hadleoli i lwybrau a gorsafoedd trên allweddol ar draws de-orllewin Lloegr.

Ymhlith y lleoliadau a dargedwyd roedd Bournemouth, Bryste a Weymouth, gan ganolbwyntio ar lwybrau trên uniongyrchol i ddinasoedd mwy ledled Lloegr sy'n aml yn lleoliadau allforio cyffuriau.

Dywedodd arweinydd Tasglu Llinellau Cyffuriau BTP, y Ditectif Uwch-arolygydd Gareth Williams: "Mae'r canlyniadau hyn yn dyst i'r gwaith partneriaeth llwyddiannus gyda'n cydweithwyr plismona yn y rhanbarth.

"Mae rhannu gwybodaeth yn allweddol i amharu ar fodel busnes Llinellau Cyffuriau ac, yn bwysig, nodi a diogelu'r rhai sy'n cael eu hecsbloetio gan y troseddwyr hyn i symud eu nwyddau niweidiol ledled y DU.

"Byddwn yn mynd i'r afael â'r math hwn o drosedd ochr yn ochr â'n partneriaid plismona lle bynnag y mae'n digwydd, gan sicrhau bod cyffuriau'n cael eu rhyng-gipio cyn iddynt gyrraedd cymunedau."

Roedd yr ymgyrchoedd yn rhan o ymdrechion Tasglu Llinellau Cyffuriau BTP drwy gydol y flwyddyn i wneud y rheilffordd yn amgylchedd gelyniaethus i droseddwyr trefnedig symud cyffuriau ac arian anghyfreithlon ledled y DU.

Un o nodau allweddol y tîm yw nodi a diogelu plant ac oedolion sy'n agored i niwed sy'n aml yn cael eu hecsbloetio gan y troseddwyr trefnedig hyn i gludo'r cyffuriau ac arian parod rhwng lleoliadau mewnforio ac allforio.

Ers sefydlu'r Tasglu gyda chyllid y Swyddfa Gartref ym mis Rhagfyr 2019, mae wedi arestio 1,436 o bobl, wedi atafaelu 780 dogn o gyffuriau a £536k mewn arian parod ac wedi tynnu 285 o arfau peryglus oddi ar y rheilffordd. Mae hefyd wedi cyfeirio 79 o unigolion at y mecanwaith atgyfeirio cenedlaethol ar gyfer diogelu.