£100,000 wedi'i atafaelu mewn un ymgyrch a 140 o arestiadau ers dechrau cyfyngiadau Covid-19 - Tasglu Llinellau Cyffuriau BTP

Mae gwaith Heddlu Trafnidiaeth Prydeinig i dynnu delio cyffuriau trwy linellau Cyffuriau oddi ar y rheilffordd wedi parhau â 140 o arestiadau ers bron i ddechrau'r cyfyngiadau ym mis Ebrill. 

Mae ei Dasglu pwrpasol, a ddechreuwyd ym mis Rhagfyr â chyllid y Swyddfa Gartref, yn cyflawni ymgyrchoedd ledled Cymru, Lloegr a'r Alban bron yn ddyddiol.

Ers iddo ddechrau, mae'r tîm wedi gwneud 416 o arestiadau, wedi tynnu 38 o arfau peryglus oddi ar y rheilffordd, ac wedi atafaelu symiau sylweddol o gyffuriau ac arian anghyfreithlon.

Mae digwyddiadau nodedig diweddar yn cynnwys:

Darganfuwyd 170 o lapiadau o gyffuriau dosbarth A yr amheuir eu bod wedi'u stwffio y tu mewn i dwb o Vaseline lle arestiwyd bachgen 17 oed o Lundain yng ngorsaf Basingstoke yn Hampshire ar ddydd Sul 7 Mehefin.  Roedd yr arestiad wedi dilyn gwaith gan dimau Llinellau Cyffuriau BTP a Heddlu Hampshire.

Atafaelwyd oddeutu £100,000 yng ngorsaf Lime Street Lerpwl pan stopiwyd dyn canol oed yn ystod ymgyrch ar y cyd rhwng Heddlu Trafnidiaeth Prydeinig a Heddlu Glannau Mersi ar ddydd Sadwrn 23 Mai.

Arestiwyd dyn arall, 27 oed, yng ngorsaf Lime Street Lerpwl ar ddydd Mawrth 12 Mai pan ganfuwyd pecyn o rywbeth yr amheuid ei fod yn ganabis wedi'i stwffio o dan bram ei fachgen pedwar diwrnod oed.  

Delio cyffuriau Llinellau Cyffuriau yw symud cyffuriau gan gangiau o ddinasoedd i drefi llai - maent yn ecsbloetio ac yn dychryn plant neu oedolion sy'n agored i niwed i gludo'r cyffuriau, neu'r arian y mae'n ei gynhyrchu, rhwng lleoliadau, gan ddefnyddio'r rheilffordd yn aml.

Nod y Tasglu yw diogelu'r bobl sy'n cael eu hecsbloetio gan gangiau Llinellau Cyffuriau a thynnu'r math hwn o weithgaredd troseddol o'r rhwydwaith reilffyrdd.

Mae cyfran fawr o'r rhai sy'n cael eu harestio gan y Tasglu am droseddau cyffuriau o dan 18 oed ac mae mwy na hanner o dan 24 oed.

Yr ifancaf a arestiwyd hyd yma oedd bachgen 14 oed a gafodd ei stopio yng ngorsaf Brighton â 12 craig o grac cocên ym mis Ionawr 2020.

Gwneir ymdrechion i ddiogelu unrhyw berson bregus neu sydd wedi'i ecsbloetio sy'n cael ei arestio fel rhan o linellau Cyffuriau, gan eu hatgyfeirio i wasanaethau wedi'i creu i annog a chefnogi'r unigolyn i ffwrdd oweithgareddau troseddol peryglus. 

Mae tri ar ddeg o bobl wedi cael eu hatgyfeirio i'r Mecanwaith Atgyfeirio Cenedlaethol i'w diogelu ers i'r Tasglu ddechrau.

Dywedodd arweinydd y Tasglu, y Ditectif Uwch-arolygydd Gareth Williams: “Mae ein Tasglu mewn sefyllfa unigryw.  Ni yw'r unig heddlu sy'n gweithredu'n genedlaethol, ac mae'n golygu bod gennym ddealltwriaeth ddofn o sut mae'r mater hwn yn effeithio ar gymunedau ar raddfa genedlaethol.

"Mae ein profiad wedi profi bod gangiau sy’n defnyddio’r rhwydwaith reilffyrdd yn dibynnu ar bobl iau i symud cyffuriau.  Mae'r unigolion hyn yn ddioddefwyr, yn cael eu gorfodi trwy ecsbloetio neu ddychryn i fynd i mewn i sefyllfaoedd enbyd, a'n blaenoriaeth bob amser yw sicrhau bod cefnogaeth ar gael a all eu cael allan o niwed ac i ffwrdd o droseddu.

“Ers mis Rhagfyr, rydym wedi bod yn cynnal ymgyrchoedd yn ddyddiol, bob amser yn seiliedig ar ddatblygu cudd-wybodaeth sy’n dangos lle mae gangiau’n gweithredu. Rydym yn cael rhan o'n gwybodaeth trwy weithio mewn partneriaeth ag asiantaethau gorfodi'r gyfraith eraill, ond hefyd yn bwysig trwy gefnogaeth y diwydiant rheilffyrdd sy'n hyfforddi eu staff i nodi arwyddion o ecsbloetio. 

“Mae dangosyddion allweddol yn cynnwys plentyn ifanc yn teithio pellteroedd maith, ar ei ben ei hun gyda swm mawr o arian parod, neu'n osgoi unrhyw fath o awdurdod mewn gorsafoedd. Mae'r dangosyddion hyn yn fach ond yn amhrisiadwy ac yn helpu i lywio ble rydym yn targedu nesaf. Mae dealltwriaeth esblygol o droseddu Llinellau Cyffuriau ac rydym yn barod i fynd i’r afael ag ef, lle bynnag y mae’r wybodaeth yn ein harwain. ”