Gyda'n gilydd gallwn ni atal aflonyddu rhywiol

Heddlu Trafnidiaeth Prydain yw'r heddlu cenedlaethol ar gyfer trenau, tiwbiau a thramiau ledled Cymru, Lloegr a'r Alban. Rydym yn cymryd ymagwedd dim goddefgarwch tuag at aflonyddu rhywiol a throseddau rhywiol.

Sut alla i helpu os ydw i'n gweld rhywun yn cael ei aflonyddu'n rhywiol?

Ar y trên, efallai y byddwn yn clywed rhywun yn gwneud sylwadau rhywiol yn gyson i deithiwr arall neu'n eu gweld yn eu dilyn drwy'r cerbyd pan ydynt wedi'i gwneud yn glir nad ydynt am siarad.

Efallai y gwelwn rywun yn sefyll yn rhy agos yn fwriadol, yn rhwbio yn erbyn rhywun neu'n ceisio "uwchsgertio" (tynnu lluniau i fyny ddillad rhywun). 

• Cael help. Os gwelwch chi unrhyw beth sy'n gwneud i chi deimlo'n anghyfforddus, siarad ag aelod o staff neu'r heddlu. Cysylltwch â Heddlu Trafnidiaeth Prydain drwy anfon neges destun at 61016.
• Tynnu sylw i ffwrdd o'r sefyllfa. Mewn sawl ffordd, eich presenoldeb yw eich uwchbŵer mwyaf. Mewn rhai achosion, os yw'n ddiogel gwneud hynny, gallai sefyll rhwng person sy'n achosi niwed a dioddefwr fod yn ddigon i atal yr hyn sy'n digwydd
  • Rhowch rywbeth yn y rheseli uwchben
  • Codwch i weld map yr orsaf
  • Ewch am dro i lawr y cerbyd i ymestyn eich coesau
• Siaradwch â'r dioddefwr, tawelwch eu meddwl, a chynnig ffordd gynnil iddynt allan o'r sefyllfa. Os nad ydych yn siŵr beth i'w ddweud, beth am:
  • Ydych chi'n iawn?
  • Hoffech chi gael fy sedd?

• Os ydych chi'n teimlo eich bod yn gallu siarad â'r person sy'n achosi'r broblem, siaradwch yn dawel â nhw.
  • Gallech ddweud rhywbeth nad yw'n gysylltiedig fel "Beth yw'r stop nesaf?" neu "Ai dyma'r trên i Littlehampton?". Gall unrhyw beth sy'n creu ymyriad helpu.
  • Os ydych chi'n teimlo ei fod yn ddiogel, efallai dweud "Hei, mae hyn yn mynd ychydig yn rhy bell, mae'n amlwg eu bod braidd yn ofnus".
• Dod o hyd i'ch ffrindiau – Ceisio cefnogaeth gan eraill o'ch cwmpas. Os ydych wedi gweld y broblem, bydd eraill wedi hefyd. Yn aml, mewn grwpiau, dydyn ni ddim yn gweithredu oherwydd nad yw eraill yn gwneud unrhyw beth.  Byddwch y cyntaf i weithredu.  Gofynnwch am help a pheidiwch â synnu pan fydd eraill yn ymuno â chi.

Mae'r rhain i gyd yn ffyrdd diogel o fod yn wir i chi'ch hun a helpu person arall.

Mae eich diogelwch yn bwysig: pan ydych chi'n helpu rhywun mae'n bwysig cadw'n ddiogel eich hun. Cofiwch bob amser, nid oes rhaid i chi gamu i mewn – gallwch helpu drwy riportio'r hyn a welwch i Heddlu Trafnidiaeth Prydeinig.

Beth os ydw i'n cael fy aflonyddu'n rhywiol?

Gwyddom y gall aflonyddu rhywiol mewn mannau cyhoeddus gael effaith wirioneddol ar y rhai sy'n ei brofi a gall effeithio ar ba mor ddiogel a hyderus rydych chi'n teimlo. Mae Heddlu Trafnidiaeth Prydeinig wedi ymrwymo i sicrhau bod dioddefwyr a goroeswyr aflonyddu rhywiol yn cael gwasanaeth cyson a chefnogol ta waeth ble maent yn y wlad neu pan fydynt yn riportio'r hyn sydd wedi digwydd iddynt.

Mae'n cymryd dewrder i riportio aflonyddu rhywiol ac mae unrhyw beth sydd wedi gwneud i chi deimlo'n anghyfforddus yn werth ei riportio. Byddwn bob amser yn eich cymryd o ddifrif.