Gofyn am wybodaeth o dan Gyfraith Clare: Gwneud cais Cynllun Datgelu Trais Domestig (DVDS)
Mae Cyfraith Clare yn galluogi'r heddlu i ryddhau gwybodaeth am unrhyw hanes blaenorol o drais neu gamdriniaeth a allai fod gan berson. Mae'n golygu y gallwn ddarparu gwybodaeth sy'n helpu i amddiffyn pobl sydd mewn perygl ac atal troseddau pellach.
O dan Gyfraith Clare gallwch wneud cais am wybodaeth am:
- eich partner presennol neu gyn-bartner rydych chi'n dal i fod mewn cysylltiad â nhw, oherwydd eich bod yn poeni y gallai fod ganddynt hanes o gam-drin a’u bod yn risg i chi
- partner presennol neu gyn-bartner i ffrind neu berthynas y maen nhw'n dal i gael cysylltiad â nhw, oherwydd eich bod yn poeni y gallent fod mewn perygl
Efallai na fyddwch chi’n gymwys i gael yr wybodaeth rydych chi eisiau ei chael. Ar ôl inni adolygu'ch cais, byddwn ni’n rhoi gwybod i chi a ydych chi’n gymwys ai peidio.
Sylwch: Nid cofnod troseddol llawn fydd unrhyw wybodaeth sy’n cael ei rhyddhau dan gynllun Cyfraith Clare (DVDS). Mae'r wybodaeth rydyn ni'n ei darparu yn aml yn grynodeb, a hwnnw wedi'i olygu, a dim ond yr hyn sy'n angenrheidiol er mwyn amddiffyn y person sy’n wynebu risg o niwed fydd yn cael ei roi.
Nid yw'n disodli’r canlynol: Gwiriadau’r CRB (Biwro Cofnodion Troseddol), gwiriadau’r DBS (Gwasanaeth Datgelu a Gwahardd), ceisiadau gwrthrych am wybodaeth neu geisiadau Rhyddid Gwybodaeth. Mae unrhyw ddatgeliad yn gyfrinachol a does dim modd ei ddefnyddio mewn achos llys.
Os ydych yn byw yn yr Alban, gallwch ofyn am wybodaeth o dan y gynllun datgelu camdriniaeth ddomestig yn yr Alban.
Offeryn cyngor
Gofyn am wybodaeth o dan Gyfraith Clare: Gwneud cais Cynllun Datgelu Trais Domestig (DVDS)
Gallwch wneud cais DVDS mewn dwy ffordd: ar-lein neu mewn gorsaf heddlu.
Byddwn ni’n gofyn ichi roi:
- eich enw
- eich cyfeiriad
- eich dyddiad geni
- eich manylion cyswllt (os ydych chi'n gwneud cais ar ran rhywun arall yn rhinwedd eich swydd broffesiynol, rhowch eich manylion cyswllt yn y gwaith yn unig)
Byddwn ni hefyd yn gofyn sut hoffech inni gysylltu â chi. Mae hyn yn golygu:
- cewch chi ddewis sut rydyn ni’n cysylltu â chi am y tro cyntaf. Os dewiswch chi’r ebost, efallai y bydd ein hymateb yn mynd i'ch ffolder sothach neu sbam. Byddwch chi'n gwybod mai neges gennyn ni sydd yno os yw'n dod o gyfeiriad ebost police.uk.
- bydd angen inni siarad â chi ar y ffôn wedyn, felly bydd angen ichi gynnwys rhif y gallwn ni siarad â chi arno.
- y lle gorau a'r amserau mwyaf diogel i gysylltu â chi.
Byddwn ni hefyd yn eich holi am y person rydych chi'n gwneud cais am wybodaeth amdanyn nhw, gan gynnwys:
- eu henw nhw
- eu cyfeiriad cyfredol ac unrhyw gyfeiriadau blaenorol yn y pum mlynedd diwethaf. Os nad ydych chi'n gwybod hyn, gallwch roi’r ardal inni, sef y dref neu’r rhan o ddinas lle maen nhw'n byw o bosibl
- eu dyddiad geni nhw
Ar-lein
Cyfartaledd amser cwblhau: 15 munud.
Sylwer: Ni fyddwch yn gallu cadw eich cais wrth i chi fynd drwy’r ffurflen; bydd gennych ddwy awr i gwblhau pob cam o’r ffurflen cyn y bydd yr amser yn dod i ben.
Cliciwch 'Dechrau' isod i gychwyn eich cais.
Mewn gorsaf heddlu
Gallwch fynd i unrhyw orsaf heddlu i wneud cais. Bydd swyddog heddlu neu aelod o staff yr heddlu yn cymryd ychydig o fanylion ac yn sgwrsio gyda chi am y camau nesaf.
Beth sy’n digwydd wedi i mi wneud cais?
Rydyn ni’n anelu at wneud adolygiad cychwynnol o'r cais o fewn 24 awr er mwyn asesu:
- a oes yna risg uniongyrchol neu risg sydd ar fin digwydd.
- a all y cais fynd yn ei flaen (Efallai na fyddwch chi’n gymwys i gael yr wybodaeth rydych chi eisiau ei chael. Ar ôl inni adolygu'ch cais, byddwn yn rhoi gwybod ichi a ydych chi’n gymwys ai peidio.)
Os gall eich cais barhau, byddwn yn ei anfon at y tîm neu'r uned gywir. Byddan nhw’n anelu at gysylltu â chi o fewn 10 diwrnod gwaith i drefnu cyfarfod, naill ai'n bersonol neu drwy alwad fideo.
Yn y cyfarfod, bydd angen ichi ddangos prawf o bwy ydych chi. Pasbort neu drwydded yrru sydd orau. Os nad yw’r rhain gennych chi, efallai y byddwn ni’n derbyn ID llun arall neu ddogfennau fel tystysgrif eni, bil cyfleustodau, neu gyfriflen banc.
Dim ond gyda'r person sy’n wynebu risg o gael niwed y byddwn ni’n rhannu gwybodaeth, neu'r person sydd yn y sefyllfa orau i amddiffyn y person yna rhag niwed. Os penderfynwn ni rannu gwybodaeth, byddwn yn gwneud hynny ar lafar. Dydyn ni ddim yn rhannu copïau ysgrifenedig o'r datgeliad.
Os ydyn ni’n credu bod rhywun yn wynebu risg, neu os byddwch chi'n dweud wrthon ni fod trosedd wedi digwydd, efallai y byddwn ni neu'n hasiantaethau partner yn gweithredu ar unwaith. Mae camdriniaeth ddomestig yn drosedd.
Rydyn ni’n anelu at gwblhau ceisiadau o fewn 28 diwrnod gwaith. Efallai y bydd rhesymau pam mae’n cymryd mwy na hyn. Os bydd hynny’n digwydd, byddwn yn rhoi gwybod ichi.
Os ydych chi’n meddwl bod rhywun mewn perygl, neu eich bod yn amau neu’n gwybod am gam-drin domestig sy’n digwydd, ffoniwch ni ar 101 neu ei riportio ar-lein.