Dau ddyn wedi'u cyhuddo o droseddau caethwasiaeth fodern yn dilyn ymchwiliad Llinellau Cyffuriau

Mae dau ddyn wedi’u cyhuddo o droseddau Caethwasiaeth Fodern ar ôl iddynt gael eu harestio yng Nghaint am iddynt ddefnyddio bachgen 16 oed i ddelio â chyffuriau, yr honnir.

Yn dilyn ymchwiliad, arestiwyd Javarni McPherson, 21, o Peckham Park Road yn Llundain, a Trevis Abiola, 21, o High Street yn Orpington, â chefnogaeth Heddlu Caint yng Nghaergaint ar ddydd Mercher 1 Gorffennaf.

Cyhuddwyd y ddau ohonynt o Fasnachu mewn Pobl, ymwneud â chyflenwi cocên ac ymwneud â chyflenwi heroin. 

Cyhuddwyd McPherson hefyd o yrru tra dan ddylanwad cyffuriau.

Mae'r ddau wedi pledio'n ddieuog i'r troseddau yn Llys Ynadon Medway ac maen nhw nawr i ymddangos yn Llys y Goron Maidstone ar ddydd Gwener 31 Gorffennaf.

Dyma'r cyhuddiadau Caethwasiaeth Fodern gyntaf sydd wedi'u sicrhau gan Dasglu Llinellau Cyffuriau Heddlu Trafnidiaeth Prydeinig.

Tasglu Llinellau Cyffuriau BTP

Mae Heddlu Trafnidiaeth Prydeinig wedi bod yn cyflawni ymgyrchoedd Llinellau Cyffuriau ledled Cymru, Lloegr a'r Alban ers iddo sicrhau cyllid y Swyddfa Gartref ar gyfer Tasglu ym mis Rhagfyr 2019.

Prif nodau'r Tasglu yw mynd i'r afael â chyffuriau ar y rhwydwaith rheilffyrdd, ac amddiffyn plant ac oedolion bregus sy'n aml yn cael eu hecsbloetio gan gangiau i werthu neu symud cyffuriau.

Gwneir ymdrechion i ddiogelu unrhyw berson bregus neu sy'n cael ei ecsbloetio sy'n cael ei arestio fel rhan o Linellau Cyffuriau, gan eu hatgyfeirio i wasanaethau a grëwyd i annog a chefnogi'r unigolyn i droi ffwrdd o weithgareddau troseddol peryglus. 

Mae chwech ar hugain o bobl wedi cael eu hatgyfeirio i'r Mecanwaith Atgyfeirio Cenedlaethol i'w ddiogelu hyd yma. 

Arestiwyd 470 hefyd, atafaelwyd 75 o arfau peryglus, atafaelwyd £173,000 mewn arian anghyfreithlon ac roedd 236 o atafaeliadau o gyffuriau dosbarth A a dosbarth B.

Dywedodd arweinydd y Tasglu, y Ditectif Uwch-arolygydd Gareth Williams: “Mae ein Tasglu mewn sefyllfa unigryw, rydym yn gweithredu’n genedlaethol ac yn targedu gweithgareddau Llinellau Cyffuriau ar draws y rhwydwaith reilffyrdd. 

“Mae ein profiad wedi profi bod gangiau sy’n defnyddio’r rhwydwaith reilffyrdd yn dibynnu ar bobl iau i symud cyffuriau. Mae'r unigolion hyn yn ddioddefwyr, yn cael eu gorfodi trwy ecsbloetio neu ddychryn i fynd i mewn i sefyllfaoedd enbyd, a'n blaenoriaeth bob amser yw sicrhau bod cefnogaeth ar gael a all eu cael i ffwrddn o niwed ac i ffwrdd o droseddu.

“Ers mis Rhagfyr, rydym wedi bod yn cynnal ymgyrchoedd yn ddyddiol, bob amser yn seiliedig ar ddatblygu cudd-wybodaeth sy’n dangos lle mae gangiau’n gweithredu. Rydym yn cael rhan o'n gwybodaeth trwy weithio mewn partneriaeth ag asiantaethau gorfodi'r gyfraith eraill, ond hefyd yn bwysig trwy gefnogaeth y diwydiant rheilffyrdd sy'n hyfforddi eu staff i nodi arwyddion o ecsbloetio. 

“Mae dangosyddion allweddol yn cynnwys plentyn ifanc yn teithio pellteroedd maith, ar ei ben ei hun gyda swm mawr o arian parod, neu'n osgoi unrhyw fath o awdurdod mewn gorsafoedd. Mae'r dangosyddion hyn yn fach ond yn amhrisiadwy ac yn helpu i lywio ble rydym yn targedu nesaf. Mae hon yn ddealltwriaeth esblygol o droseddu ym maes Llinellau Cyffuriau ac rydym yn barod i fynd i’r afael â hi, lle bynnag y mae’r wybodaeth yn ein harwain. ”