Cefnogwyr pêl-droed wedi'u dedfrydu ar ôl ymladd yng ngorsaf reilffordd Clapham Junction - Llundain

Mae tri dyn wedi’u dedfrydu yn dilyn ffrwgwd yn ymwneud â phêl-droed mewn gorsaf brysur yn Ne Llundain ym mis Mawrth 2018.

Ymddangosodd Jack Jameson, Harry Grant a Keiran Stephens yn Llys Ynadon San Steffan ar ddydd Llun 10 Awst lle pledion nhw’n euog i affráe.

Cafodd y tri dyn eu dedfrydu gan farnwr yn Llys y Goron Llundain Fewnol ar ddydd Iau 26 Tachwedd.

Dedfrydwyd Jack Jameson, 25, ac o English Road, Southampton, i 10 mis o garchar wedi’i ohirio am 18 mis. Bydd yn cwblhau 150 awr o waith cymunedol o fewn 12 mis ac yn talu gordal dioddefwr o £140 ac £85 mewn costau. Rhoddwyd gorchymyn gwahardd pêl-droed pum mlynedd i Jameson hefyd.

Dedfrydwyd Harry Grant, 22, ac o Warwick Road, Bournemouth, i wyth mis o garchar wedi'i ohirio am 12 mis. Mae'n ofynnol iddo hefyd gwblhau 120 awr o waith cymunedol o fewn 12 mis a thalu gordal dioddefwr o £140 ac £85 mewn costau.

Cafodd Keiran Stephens, 24, ac o Derryvode, Iwerddon, hefyd ei ddedfrydu i wyth mis o garchar wedi’i ohirio am 12 mis. Gan fod Stephens yn byw yn Iwerddon, rhoddwyd gofyniad gweithgarwch gwaharddedig iddo hefyd yn ei gyfyngu rhag dod i mewn i'r DU am fwy na saith diwrnod yn olynol ar gyfnod treigl o bedair wythnos yn ystod y 12 mis nesaf. Mae'n ofynnol iddo hefyd dalu dirwy o £750, gordal dioddefwr o £140 ac £85 mewn costau.

Ar ddydd Sadwrn 31 Mawrth 2018, roedd cefnogwyr AFC Bournemouth yn teithio adref yn dilyn gêm bêl-droed yn erbyn Watford FC yn Stadiwm Vicarage Road, ac roedd cefnogwyr Southampton yn gwneud yr un peth ar ôl gêm yn erbyn West Ham United FC yn Stadiwm Llundain. Teithiodd y ddwy garfan o gefnogwyr trwy orsaf reilffordd Clapham Junction ar eu llwybrau adref.

Wrth i gefnogwyr Bournemouth adael gorsaf Clapham Junction, fe'u clywyd yn llafarganu wrth iddynt fynd trwy'r rhwystrau tocynnau. Wrth gerdded trwy'r ganolfan siopa sydd ynghlwm â'r orsaf, gweiddiodd Jameson, un o gefnogwyr Southampton FC, enllibion ar y grŵp gan ddal potel wydr. Wrth i'r grŵp o gefnogwyr geisio siarad â Jameson, fe wnaeth anelu ergydion, gan benio un ohonyn nhw yn ei wyneb.

Fe ddialodd dau aelod o’r grŵp, Grant a Stephens, ar ymddygiad Jameson a chafwyd sgarmes. Yn ystod hynny, tarodd Jameson Stephens yn ei ysgwydd â’r botel wydr yr oedd yn ei dal, a phwniodd Grant a Stephens Jameson dro ar ôl tro

Parhaodd y sgarmes i mewn i siop Marks & Spencer’s cyn i swyddogion Heddlu Trafnidiaeth Prydeinig (BTP) wasgaru’r grŵp. Ar ôl ymyrraeth yr heddlu, parhaodd Stephens i geisio gwthio trwy swyddogion i barhau i ymladd â Jameson.

Yna arestiwyd Jameson, Grant a Stephens i gyd ar amheuaeth o affráe

Dywedodd Cwnstabl yr Heddlu, Roisin Harris: “Mae gweithredoedd y tri dyn hyn yn dangos diystyrwch llwyr i weddill y cyhoedd sy’n teithio, yn arbennig teuluoedd â phlant, wrth iddynt annog trais o fewn gorsaf reilffordd hynod o brysur.

“Ni fydd trais sy’n gysylltiedig â phêl-droed yn cael ei oddef yn unman ar draws y rhwydwaith a hoffwn ddiolch i’r llysoedd am euogfarnu’r tri dyn. Rwyf yn gobeithio y bydd yn gwneud iddyn nhw feddwl ddwywaith am ymddwyn yn dreisgar yn y dyfodol.

“Os bydd unrhyw un byth yn profi ymddygiad o’r natur hon wrth deithio gallant anfon neges destun atom yn gynnil ar 61016, neu ffonio 999 mewn argyfwng.”