Sut i riportio cam-drin domestig
Ein blaenoriaeth gyntaf yw eich diogelu chi ac unrhyw blant sydd gennych. Os yw’r sefyllfa yn un o argyfwng bydd swyddog yn mynychu ac, os yw’n addas, yn angenrheidiol ac yn gyfreithiol i wneud hynny, arestio’r tramgwyddwr, a chymryd camau i’ch diogelu rhag rhagor o niwed – gan roi amser i chi feddwl.
Ei riportio
Os ydych yn dioddef cam-drin domestig, neu’n gwybod am rywun sy’n dioddef, a bod argyfwng neu os oes bywyd mewn perygl, ffoniwch 999 nawr. Os ydych yn fyddar neu’n drwm eich clyw, defnyddiwch ein gwasanaeth ffôn testun 18000 neu tecstiwch ni ar 999 os ydych wedi cofrestru ymlaen llaw gyda’r gwasanaeth SMS brys.
Os ydych wedi dioddef cam-drin domestig, neu eich bod yn poeni am rywun sydd yn dioddef, gallwch riportio hyn yn niogelwch eich gorsaf heddlu leol. Os ydych angen cyfieithydd, gallwn ddarparu rhywun dros y ffôn i ddechrau ac yn ddiweddarach yn bersonol.
Mewn achosion di-argyfwng ac i gael cyngor cyffredinol, ffoniwch 0800 40 50 40.
Sut allwn ni helpu ar unwaith
Bydd ein swyddogion yn gwneud yn siŵr y cewch eich trin â pharch ac yn siarad â chi mewn man oddi wrth y person sy’n gyfrifol am y cam-drin. Os ydych chi wedi cael eich anafu’n gorfforol, mae’n bwysig bod meddyg yn archwilio eich anafiadau. Byddwn yn trefnu gofal meddygol, os oes angen.
Cadw mewn cysylltiad
Byddwn yn cadw mewn cysylltiad â chi ac yn eich arwain drwy’r ymchwiliad cyfan. Ein nod yw cysylltu â chi o fewn 24 awr wedi i chi riportio’r drosedd a rhoi gwybod i chi beth sy’n digwydd.
Mewn nifer o achosion, bydd dioddefwyr cam-drin domestig angen opsiynau ar gyfer llety arall dros dro neu yn y tymor hwy. Efallai y bydd angen gwaharddeb arnoch er mwyn rhwystro’r tramgwyddwr rhag dod yn agos atoch, neu efallai y bydd angen cwnsela neu gefnogaeth arnoch.
Rydym yn gweithio ochr yn ochr â chynghorwyr sydd wedi’u hyfforddi’n dda, sydd ddim yn aelodau’r heddlu, a fydd yn gallu eich cynorthwyo gydag ôl-ofal i chi a’ch teulu.
Os oes angen i chi fynychu’r llys am unrhyw reswm mae gwasanaethau cefnogi hefyd ar gael fel nad ydych yn teimlo wedi eich llethu neu’ch dieithrio gan y broses gyfreithiol.
Gwneud cais am orchymyn llys (gwaharddeb)
Os ydych wedi dioddef trais domestig, gallwch hefyd wneud cais am waharddeb i’ch diogelu chi neu’ch plentyn rhag niwed neu rhag cael eich bygwth ('gorchymyn peidio ag ymyrryd'), neu waharddeb i benderfynu pwy all fyw yn y cartref teuluol ('gorchymyn meddiannaeth').
Gall person a enwir yn y gorchymyn llys gael ei arestio os bydd yn ei dorri.