O dan Ddeddf Diwygio'r Heddlu 2002, caiff cwynion am gyfeiriad a rheolaeth yr Heddlu Trafnidiaeth Prydeinig eu trin yn wahanol i gwynion am ymddygiad swyddogion yr heddlu a staff yr heddlu. Mae'r wybodaeth hon yn cyfeirio at ein polisi ar ddelio â chwynion sy'n ymwneud â'r ffordd y mae'r Heddlu Trafnidiaeth Prydeinig yn cael ei gyfeirio a'i reoli.

Mathau o gwynion

Bydd cwyn am gyfeiriad a rheolaeth yr Heddlu Trafnidiaeth Prydeinig yn un am:

• polisïau plismona gweithredol (pan nad yw'n ymwneud â chamymddwyn)
• penderfyniadau sefydliadol sy'n dylanwadu ar gyfeiriad a rheolaeth
• safonau plismona cyffredinol yr Heddlu Trafnidiaeth Prydeinig
• penderfyniadau rheolaeth weithredol (pan nad yw'n ymwneud â chamymddwyn)

Pwy sy'n delio â'r cwynion?

Y prif gwnstabl ac Awdurdod Heddlu Trafnidiaeth Prydain sy'n gyfrifol am ddelio â chwynion am gyfeiriad a rheolaeth yr Heddlu.

Ymdrin â chwynion

Caiff pob cwyn ei chofnodi a'i chyfeirio at y prif swyddog neu unigolyn arall sy'n gweithredu ar ei ran. Caiff llythyr ffurfiol gyda manylion am y penderfyniad a wnaed ei anfon at yr achwynydd i esbonio'r canfyddiadau. Mae'n bosib y caiff cyfarfod ffurfiol ei drefnu hefyd i roi esboniad llawn o'r penderfyniad i'r achwynydd. Mae'r Heddlu Trafnidiaeth Prydeinig yn delio â phob cwyn yn ddifrifol iawn a bydd yn rhoi esboniad llawn am y penderfyniad. Os oes gofyn am adolygiad o bolisi neu drefn benodol caiff yr achwynydd ei hysbysu.

Gwybodaeth a gedwir yn ôl

Mae'n bosib na chaiff gwybodaeth o natur sensitif ei throsglwyddo i'r achwynydd.

Amserlen ar gyfer cwynion

Caiff cwynion eu trin o fewn 28 diwrnod i'w cofnodi. O ganlyniad i gŵyn, os bydd angen adolygu neu newid un o bolisiau'r Heddlu Trafnidiaeth Prydeinig, gallai hyn effeithio ar yr amser a gymerir i ymateb. Caiff yr achwynydd ei hysbysu drwy gydol y broses a chaiff wybod am unrhyw ddatblygiadau.

Gwybodaeth am gwynion

Mae'r Heddlu Trafnidiaeth Prydeinig yn rhoi gwybodaeth rheoli i Awdurdod Heddlu Trafnidiaeth Prydain bedair gwaith y flwyddyn am y cwynion a gawn yn ymwneud â chyfeiriad a rheolaeth. Mae hyn er mwyn sicrhau bod perfformiad yr Heddlu Trafnidiaeth Prydeinig yn cael ei fonitro'n barhaus a bod y gwasanaeth yn cael ei wella.

Rôl Comisiwn Cwynion Annibynnol yr Heddlu

Rôl y Comisiwn yw sicrhau bod cwynion yn erbyn yr heddlu yn cael eu trin yn effeithlon. Mae'r Comisiwn yn gosod safonau ar gyfer y ffordd y mae'r heddlu yn ymdrin â chwynion ac yn helpu'r heddlu i wella'r ffordd maent yn gweithio, pan fo rhywbeth wedi mynd o'i le.

Dolenni perthnasol

Comisiwn Cwynion Annibynnol yr Heddlu

Awdurdod Heddlu Trafnidiaeth Prydain